मराठी वृत्तपत्र लेखक संघ मुंबईचा
७० वा वृत्तपत्र लेखक दिन
मुंबईच्या दैनिकांमधून सातत्याने वृत्तपत्रलेखन करणारे २२ ऑगस्ट १९४९ रोजी फोर्टच्या तांबे उपाहारगृहात संमेलनाच्या निमित्ताने एकत्र आले होते. या पहिल्या संमेलनास मोठ्या उत्साहाने पार पडले होते.या संमेलनाच्या अध्यक्षस्थानी सुप्रसिद्ध साहित्यिक प्रा अनंत काणेकर हे होते. तर प्रा. वा. ल. कुलकर्णी, आप्पा पेंडसे, र.गो.सरदेसाई, वा.रा.ढवळे, नि.श.नवरे हे प्रमुख पाहुणे म्हणून उपस्थित होते. याचवेळी मराठी वृत्तपत्र लेखक संघ मुंबई या संस्थेची मुहूर्तमेढ रोवली गेली. या घटनेला ७० वर्षे पूर्ण होत आहेत.तेव्हापासून हा दिवस संघाच्या वतीने दरवर्षी ‘वृत्तपत्रलेखक दिन’ म्हणून साजरा केला जातो. या दिनाचे औचित्य साधून गुरुवार, दिनांक २२ ऑगस्ट २०१९ रोजी संध्याकाळी ५.३० वाजता कार्यक्रमाचे आयोजन करण्यात आले असून ज्येष्ठ वृत्तपत्र लेखक नंदकुमार रोपळेकर आणि दत्ताराम घुगे यांना जीवन गौरव प्रदान करण्यात येणार असल्याचे संघाध्यक्ष रवींद्र मालुसरे यांनी सांगितले. कार्यक्रमाला दै. नवशक्तीचे संपादक सुकृत खांडेकर आणि मुंबई मनपाचे स्थायी समिती अध्यक्ष यशवंत जाधव हे प्रमुख पाहुणे म्हणून उपस्थित राहणार आहेत. मुंबई ठाण्यातील पत्रकार,साहित्यिक आणि वृत्तपत्रलेखकांनी रुसी मेहता हॉल, जनता सेवा केंद्र, ताडदेव,मुंबई सेंट्रल रेल्वे स्टेशन -पश्चिम जवळ येथे उपस्थित राहावे असे आवाहन संघाचे प्रमुख प्रशांत घाडीगावकर यांनी केले आहे.
