पुणे, दि. 25 जून 2018 : महावितरणच्या पुणे परिमंडलाचे मुख्य अभियंता म्हणून श्री. सचिन तालेवार यांनी सोमवारी (ता. 25) कार्यभार स्वीकारला. त्यांना प्रभारी मुख्य अभियंता श्री. सुंदर लटपटे यांनी या पदाची सुत्रे सोपविली.
मुळचे नागपूर जिल्ह्यातील श्री. सचिन तालेवार यांचे शालेय शिक्षण छिंदवाडा (मध्यप्रदेश) येथे झाले आहे. त्यांनी विद्युत अभियांत्रिकी पदवी संपादन केली आहे. तसेच गूडगाव येथील (MDI) मॅनेजमेंट डेव्हलपमेंट इन्सिट्यूटमधून एनर्जी मॅनेजमेंटमध्ये पोस्ट ग्रॅज्यूएशन डिप्लोमा इन बिझीनेस मॅनेजमेंटचा अभ्यासक्रम 2007-08 मध्ये पूर्ण केला आहे. विशेष म्हणजे महावितरणकडून त्यांची या अभ्यासक्रमासाठी निवड करण्यात आली होती.
मुख्य अभियंता श्री. तालेवार हे 1997 मध्ये तत्कालिन विद्युत मंडळात कनिष्ठ अभियंता म्हणून एचव्हीडीसी चंद्गपूर येथे 500 केव्ही अतिउच्चदाब उपकेंद्र (जि. चंद्रपूर) येथे रुजू झाले. याच ठिकाणी पदोन्नतीनंतर सहाय्यक अभियंता म्हणून काम पाहिले. त्यानंतर सरळसेवा भरतीमध्ये श्री. तालेवार यांची 2006 ला कार्यकारी अभियंता म्हणून निवड झाली. या पदावर त्यांनी वर्धा, नागपूर व जालना येथे काम केले आहे. 2016 मध्ये झालेल्या सरळसेवा भरती श्री. तालेवार यांची अधीक्षक अभियंता पदी निवड झाली. तेव्हापासून ते लातूर मंडलचे अधीक्षक अभियंता म्हणून काम पाहत होते. त्यानंतर नुकत्याच झालेल्या 2018 च्या सरळसेवा भरतीमध्ये श्री. सचिन तालेवार यांची मुख्य अभियंता पदी निवड झाली आणि त्यांनी पुणे परिमंडलाचे मुख्य अभियंता म्हणून आज पदभार स्वीकारला. याआधी कार्यरत असलेले मुख्य अभियंता श्री. एम. जी. शिंदे सेवानिवृत्त झाले आहेत.
पुणे परिमंडलातील सर्व वीजग्राहकांसाठी वेगवान प्रशासकीय कामकाजाची तसेच आधुनिक ग्राहकसेवेची प्रभावीपणे अंमलबजावणी केली जाईल. वीजबिलांच्या थकबाकी वसुलीवर लक्ष केंद्रीत करून वाणिज्यिक हानी आणखी कमी करण्यासाठी व सर्व वर्गवारीतील ग्राहकांना सुरळीत वीजपुरवठ्यासाठी सर्वाधिक प्राथमिकता देण्यात येईल, असे मुख्य अभियंता श्री. सचिन तालेवार यांनी सांगितले.
