पुणे परिमंडलातील 60 हजार थकबाकीदारांची वीज खंडित
पुणे : पुणे व पिंपरी चिंचवड शहरांसह ग्रामीण भागात वीजबिलांचे थकबाकीदार असलेल्या 60 हजार 241 घरगुती, वाणिज्यिक व औद्योगिक वीजग्राहकांचा वीजपुरवठा गेल्या पंधरवड्यापासून सुरु असलेल्या ‘शून्य थकबाकी’ मोहिमेत खंडित करण्यात आला.
दरम्यान, ही मोहीम सुटीच्या दिवशीही सुरु राहणार असल्याने दि. 24 व 25 फेब्रुवारीला महावितरणचे वीजबिल भरणा केंद्र सुरु ठेवण्यात येणार आहेत.
पुणे परिमंडलात वीजबिलांची थकबाकी वसुल करण्यासाठी ‘शून्य थकबाकी’ची विशेष मोहिम सुरु झाली आहे. बुधवार (दि. 21) पर्यंत पुणे, पिंपरी चिंचवड शहरांसह मुळशी, जुन्नर, आंबेगाव, मावळ, खेड तालुक्यातील 29 कोटी 45 लाख रुपयांची थकबाकी असलेल्या 60 हजार 241 वीजग्राहकांचा वीजपुरवठा खंडित करण्यात आला आहे.
पुणे व पिंपरी चिंचवड शहरातील घरगुती, वाणिज्यिक व औद्योगिक अशा 45 हजार 693 थकबाकीदारांचा वीजपुरवठा 18 कोटी 90 लाख रुपयांच्या थकबाकीपोटी खंडित करण्यात आला आहे. तसेच मुळशी, जुन्नर, आंबेगाव, मावळ, खेड तालुक्यातील 14 हजार 548 थकबाकीदारांचा वीजपुरवठा 10 कोटी 56 लाखांच्या थकीत वीजबिलांमुळे खंडित करण्यात आला आहे.
या मोहिमेमुळे थकबाकी व चालू वीजबिलांचा वीजग्राहकांना भरणा करता यावा म्हणून पुणे परिमंडलातील महावितरणचे सर्व अधिकृत वीजबिल भरणा केंद्र दि. 24 व 25 फेब्रुवारीला सुटीच्या दिवशी सुरु राहणार आहेत. वीजग्राहकांकडे किती रक्कम थकीत आहे हे न पाहता वीजपुरवठा खंडित करण्यात येणार आहे. त्यामुळे वीजपुरवठा खंडित करण्याची कटू कारवाई टाळण्यासाठी थकीत वीजबिलांचा त्वरीत भरणा करून सहकार्य करावे, असे आवाहन महावितरणने केले आहे. थकीत वीजबिल भरण्यासाठी स्थानिक वीजबील भरणा केद्रांसह व घरबसल्या ‘ऑनलाईन’ पेमेंटसाठी महावितरणची www.mahadiscom.in ही वेबसाईट तसेच मोबाईल अॅपचा पर्याय उपलब्ध आहे.
– शनिवारी व रविवारी पर्यवेक्षणासाठी प्रादेशिक कार्यालयाचे विशेष पथके
पुणे, पिंपरी चिंचवड शहरांसह ग्रामीण भागात थकबाकीदार ग्राहकांच्या वीजजोडण्या खंडित करण्याचे व सुटीच्या दिवशीसुद्धा ही कारवाई आक्रमकपणे सुरु ठेवण्याचे निर्देश देण्यात आलेले आहेत. त्याचे पर्यवेक्षण करण्यासाठी प्रादेशिक कार्यालयातील अधिकार्यांचे विशेष पथक शनिवारी व रविवारी पुणे परिमंडलात विविध ठिकाणी भेटी देऊन थकबाकीदारांविरुद्ध सुरु असलेल्या कारवाईबाबतचा अहवाल वरिष्ठांकडे सोपविणार आहे.
