पुणे : पुणे परिमंडलातील घरगुती, वाणिज्यिक व औद्योगिक वीजग्राहकांकडून थकबाकी वसुल करण्यासाठी महावितरणच्या ‘मोहीम-शून्य थकबाकी’ला मंगळवारी (दि. 7) सुरवात झाली. प्रादेशिक संचालक श्री. संजय ताकसांडे व मुख्य अभियंता श्री. एम. जी. शिंदे यांच्या प्रमुख उपस्थितीत सुमारे एक हजार जनमित्रांनी थकबाकी वसुलीचा निर्धार केला.
सेनापती बापट मार्गावरील प्रकाशभवनात मोहिमेपूर्वी जमलेल्या हजारो जनमित्रांशी प्रादेशिक संचालक श्री. संजय ताकसांडे यांनी थेट संवाद साधला. यावेळी ते म्हणाले, महावितरणची थकबाकी ही मोठ्या प्रमाणात वाढलेली आहे. त्यामुळे थकबाकी वसुली ही प्रत्येकाची सर्वोच्च जबाबदारी असली पाहिजे. जनमित्र हे महावितरणचे आधारस्तंभ आहेत व सैनिक आहेत. मात्र आता महावितरणच्या अस्तित्वासाठी थकबाकीविरोधात लढा देण्याची वेळ आलेली आहे. त्यासाठी कर्तव्यनिष्ठेने थकबाकी वसुलीसाठी प्रयत्न केले पाहिजे. एक तर थकीत वीजबिल ताबडतोब भरा अन्यथा अंधारात राहा असा प्रत्ययच थकबाकीदारांना द्यावा, असे आवाहन त्यांनी यावेळी केले. प्रादेशिक संचालक श्री. ताकसांडे यांच्या या आवाहनाला उपस्थित जनमित्रांनी मोठा प्रतिसाद दिला व थकबाकी वसुल करण्याचा एकमुखी निर्धार केला. यावेळी मुख्य अभियंता श्री. एम. जी. शिंदे यांनी सर्व अभियंते व कर्मचाऱ्यांनी एकत्रितपणे ही मोहीम प्रभावीपणे राबविण्याचे आवाहन केले.
आज रास्तापेठ, गणेशखिंड व पुणे ग्रामीण मंडलमधील जनमित्रांना ‘मोहीम शून्य थकबाकी’च्या महत्वासह महावितरणच्या आर्थिक परिस्थितीबाबत माहिती देण्यात आली. यावेळी जमलेल्या हजारो जनमित्रांनी अद्ययावत ‘डीडीएल’ (डेली डिस्कनेक्शन लिस्ट) याद्या घेऊन प्रत्येकी सुमारे 25 ते 100 जणांच्या एका पथकाद्वारे थकबाकीदारांची संख्या अधिक असलेल्या पुणे परिमंडलातील उपनगर, परिसर, मोठ्या सोसायटी, गावे आदी ठिकाणी सकाळी 9.30 वाजता धडक मोहीम सुरु केली. रस्त्यांच्या बाजूने युनिफाॅर्ममध्ये शिस्तीत जाणाऱ्या महावितरणच्या या पथकांनी नागरिकांचे लक्ष आज वेधून घेतले होते.
पुणे परिमंडलातील पुणे, पिंपरी चिंचवड शहरांसह मुळशी, जुन्नर, आंबेगाव, मावळ, खेड तालुक्यात सद्यस्थितीत 7 लाख 88 हजार घरगुती, वाणिज्यिक व औद्योगिक ग्राहकांकडे 174 कोटी 48 लाख रुपयांची थकबाकी आहे. ती वसुल करण्यासाठी येत्या 15 नोव्हेंबरपर्यंत मोहीम शून्य थकबाकीच्या माध्यमातून विशेष वीजतोड मोहीम राबविण्यात येणार आहे. वीजग्राहकांकडे किती रक्कम थकीत आहे हे न पाहता वीजपुरवठा खंडित करण्यात येणार आहे. आजपासून सुरु झालेल्या ‘मोहिम-शून्य थकबाकी’मध्ये थेट अधीक्षक अभियंता, कार्यकारी अभियंता, लेखा अधिकारी तसेच हजारो कर्मचारी सहभागी झाले आहेत. आठ दिवसांच्या मोहिमेसाठी वरिष्ठ कार्यालयातील अभियंते, अधिकारी यांचेही विशेष पथक तयार करण्यात आले आहे.
थकीत वीजबिलांचा भरणा केला नाही तर संबंधीत ग्राहकांचा वीजपुरवठा खंडित होणार आहे. ही कटू कारवाई टाळण्यासाठी थकीत वीजबिलांचा त्वरीत भरणा करून सहकार्य करावे, असे आवाहन महावितरणने केले आहे. थकीत वीजबिल भरण्यासाठी स्थानिक वीजबील भरणा केद्गांसह व घरबसल्या ‘ऑनलाईन’ पेमेंटसाठी महावितरणची www.mahadiscom.in ही वेबसाईट तसेच मोबाईल अॅपचा पर्याय उपलब्ध आहे.
