पुणे: पुणे व पिंपरी चिंचवड शहरांसह खेड, मावळ, जुन्नर, आंबेगाव, मुळशी तालुक्यांत महावितरणने घरगुती, वाणिज्यिक, औद्योगिक व कृषीपंपधारक थकबाकीदारांचा वीजपुरवठा खंडित करण्याची मोहीम तीव्र करण्यात आली आहे. वीजग्राहकांनी थकीत वीजबिलांचा त्वरीत भरणा करून महावितरणला सहकार्य करण्याचे आवाहन मुख्य अभियंता श्री. एम. जी. शिंदे यांनी केले आहे.
पुणे परिमंडलात सद्यस्थितीत घरगुती, वाणिज्यिक तसेच औद्योगिक वर्गवारीतील 6 लाख 84 हजार 567 वीजग्राहकांकडे 170 कोटी रुपयांची थकबाकी आहे. यात 5 लाख 81 हजार 340 घरगुती ग्राहकांकडे 107 कोटी 39 लाख, वाणिज्यिक वर्गवारीतील 89 हजार 720 ग्राहकांकडे 43 कोटी 61 लाख तर 13 हजार 507 औद्योगिक ग्राहकांकडे 19 कोटी 15 लाख रुपयांची थकबाकी आहे. दिलेल्या मुदतीत वीजबिलांचा भरणा न केल्याने थकबाकीचे प्रमाण वाढत असल्याने या थकबाकीदार वीजग्राहकांचा वीजपुरवठा खंडित करण्याची धडक कारवाई सुरु करण्यात आलेली आहे.
याशिवाय पुणे परिमंडलातील 84 हजार 80 कृषीपंपधारकांकडे वीजबिलांपोटी 226 कोटी 63 लाख रुपयांची थकबाकी आहे. या थकबाकीदार कृषीपंपधारकांनी एप्रिल 2017 पासूनच्या चालू वीजबिलांचा भरणा केला नसल्यास कृषीपंपाचाही वीजपुरवठा खंडित करण्यात येत आहे.
पुणे, पिंपरी, लोणावळा, चाकण, तळेगाव आदी शहरांसह खेड, मावळ, जुन्नर, आंबेगाव, मुळशी तालुक्यांत थकबाकीदारांचा वीजपुरवठा खंडित करण्याची मोहीम तीव्र करण्यात आली आहे. महावितरणच्या संबंधित कार्यालयांतील अधिकारी व कर्मचार्‍यांसह वरिष्ठ कार्यालयातील अधिकारी व कर्मचाऱ्यांची विशेष पथके या मोहिमेत सहभागी झालेले आहेत. याशिवाय तात्पुरता किंवा कायमस्वरुपी वीजपुरवठा खंडित केल्यानंतरही थकबाकीदार अनधिकृतपणे विजेचा वापर करीत असेल तर त्यांच्याविरुद्ध फौजदारी कारवाई करण्याच्या सूचना देण्यात आल्या आहेत.
पुणे परिमंडलातील शहरी व ग्रामीण भागातील महावितरणचे सर्व अधिकृत वीजबील भरणा केंद्ग वीजग्राहकांच्या सोयीसाठी शनिवारी (दि. 28) व रविवारी (ता. 29) सुरु राहणार आहेत. या दोन्ही दिवशी सार्वजनिक सुटी आहे. सद्यस्थितीत थकबाकीदारांचा वीजपुरवठा खंडित करण्याची धडक मोहिम सुरु आहे. वीजग्राहकांना वीजबिलाचा व थकबाकीचा भरणा करणे सोयीचे व्हावे, यासाठी महावितरणचे अधिकृत वीजबील भरणा केंद्ग त्यांच्या कार्यालयीन वेळेत सुरु राहणार आहेत.
चालू व थकीत वीजबिलांचा भरणा करण्यासाठी अधिकृत वीजबील भरणा केंद्रांसह www.mahadiscom.in ही वेबसाईट तसेच मोबाईल अ‍ॅपद्वारे ‘ऑनलाईन’ सोय उपलब्ध आहे. ग्राहकांनी संभाव्य गैरसोय टाळण्यासाठी चालू देयकांचा मुदतीत व मागील महिन्यांतील थकबाकीचा त्वरीत भरणा करावा व वीजपुरवठा खंडित करण्याची कटू कारवाई नाईलाजास्तव करण्यास भाग पाडू नये, असे आवाहन महावितरणने केले आहे.
