पुणे, दि. 29 : पुणे शहरात शुक्रवारी (दि. 29) दुपारी दोनच्या सुमारास झालेल्या वादळी पावसाच्या तडाख्याने तसेच वीजतारांवर झाडे व फांद्या पडल्याने हडपसर व परिसरातील 4 वीजवाहिन्यांचे 16 वीजखांब व त्यावरील वाहिन्या जमीनदोस्त झाल्या. त्याची दुरुस्ती युद्धपातळीवर सुरु झाली आहे.
या वादळाच्या तडाख्यात वीजयंत्रणा नादुरुस्त झाल्याने हडपसर गाव व सोलापूर रोड परिसरातील सुमारे 22 हजार ग्राहकांचा वीजपुरवठा खंडित झाला होता. त्यापैकी सुमारे 18 हजार वीजग्राहकांचा वीजपुरवठा पर्यायी व्यवस्थेतून सायंकाळी सुरु करण्यात आला आहे तर उर्वरित भागातील वीजपुरवठा पर्यायी व्यवस्थेतून रात्री सुरु करण्यात येत आहे.
याबाबत माहिती अशी की, बंडगार्डन विभाग अंतर्गत हडपसर इंडस्ट्रीयलमधील हेन्ले 22 केव्ही उपकेंद्रातून रामटेकडी, सेंट मेरी, हेन्ले 1 व 2 अशा 22 केव्हीच्या 4 ओव्हरहेड वाहिन्यांद्वारे हडपसर गाव, हडपसर मार्केट, साडेसतरानळी, सातववाडी, शिंदेवस्ती, रामटेकडी, सोलापूर रोड, मगरपट्टा रोड, बी.टी. कवडे रोड आदी परिसरात वीजपुरवठा केला जातो. आज दुपारी 2 वाजताच्या सुमारास वादळ व मुसळधार पाऊस यामुळे या चारही वीजवाहिन्यांवर अनेक ठिकाणी झाडे व फांद्या कोसळल्या. वीजवाहिन्यांवर ताण आल्याने वीजवाहिन्यांवरील 16 वीजखांब जमीनदोस्त झाले. त्यामुळे वीजपुरवठा खंडित झाला. महावितरणचे अभियंता व कर्मचार्यांनी तातडीने सर्वप्रथम खाली पडलेल्या वीजवाहिन्यांची पाहणी करून त्यात सार्वजनिक सुरक्षेचा धोका नसल्याची खात्री केली आणि पर्यायी व्यवस्थेतून वीजपुरवठा सुरु करण्याचे प्रयत्न सुरु केले. मुख्य अभियंता श्री. एम. जी. शिंदे यांनीही सूचना करून पर्यायी व्यवस्थेतून संबंधीत परिसरात वीजपुरवठा सुरु करण्याचे निर्देश दिले व कोसळलेले वीजखांब व वाहिन्या उभारण्यासाठी तातडीने काम सुरु करण्यास सांगितले.
सायंकाळपर्यंत 22 केव्ही रुबी हॉल वीजवाहिनीवरून नादुरुस्त झालेल्या सेंट मेरी व रामटेकडी वीजवाहिनीवरील ग्राहकांना वीजपुरवठा सुरु करण्यात आला आहे. तसेच इतर ठिकाणीही पर्यायी सोय उपलब्ध करून हडपसर इंडस्ट्रीयल, हडपसर मार्केट, रामटेकडी इंडस्ट्रीयल, सातववाडी, मगरपट्टा, सेंट मेरी आदी भागातील सुमारे 18 हजार वीजग्राहकांचा वीजपुरवठा सुरु करण्यात आला आहे. तर शिंदेवस्ती, साडेसतरानळीचा काही भाग, बी. टी. कवडे मार्ग, गाडीतळ या परिसरातील ग्राहकांचाही वीजपुरवठा पर्यायी व्यवस्थेतून सुरु करण्यात येत असून रात्री उशिरा त्याचे काम पूर्ण होईल. दरम्यान वादळाच्या तडाख्यात जमीनदोस्त झालेले वीजखांब व वाहिन्यांची दुरुस्तीला सुरवात झाली असून येत्या दोन दिवसांत त्याचे काम पूर्ण होणार आहे. या कालावधीत पर्यायी व्यवस्थेतून भारव्यवस्थापन शक्य झाले नाही तर हडपसर, सोलापूर रोड, मगरपट्टा, रामटेकडी आदी परिसरात नाईलाजास्तव दोन ते तीन तासांचे भारनियमन करावे लागण्याची शक्यता आहे. वीजयंत्रणेची दुरुस्ती व पुरवठा सुरळीत करण्यासाठी अधीक्षक अभियंता श्री. सुंदर लटपटे, कार्यकारी अभियंता श्री. मुरलीधर येलपले, अतिरिक्त कार्यकारी अभियंता श्री. चंद्गकांत चव्हाण यांच्यासह सुमारे 55 अभियंते व कर्मचारी कार्यरत आहेत.
चौकट – शिवाजीनगर, रास्तापेठ, पिंपरी विभागात काही ठिकाणी वीजखंडित – शुक्रवारी (दि. 29) दुपारी झालेल्या वादळी पावसामुळे महावितरणच्या शिवाजीनगर, रास्तापेठ व पिंपरी विभागातील वीजपुरवठा काही ठिकाणी खंडित झाला होता. यात फातिमानगर, शिंदेछत्री, एनआयबीएम रोड, लुल्लानगर, रहेजा गार्डन, कोंढवा, बाणेर, बालेवाडी, पाषाण, वाकड रोड, कस्पटेवस्ती, जगताप डेअरी, शितोळेनगर, ताथवडे आदी परिसरात झाडे, फांद्या पडल्याने तसेच काही फलके वादळाने उडून वीजतारांवर पडल्याने वीजपुरवठा खंडित झाला होता. शिवाजीनगर, रास्तापेठ विभागातील सर्व ठिकाणी वीजपुरवठा सुरु करण्यात आला आहे. तर पिंपरीमधील जगताप डेअरी, वाकड रोडचा काही परिसर, शितोळेनगरमधील वीजपुरवठा यंत्रणेची दुरुस्ती किंवा पर्यायी व्यवस्था करून रात्री उशिरापर्यंत सुरु करण्यात येत आहे.
