पुणे: राज्याचा २०२३-२४ चा अर्थसंकल्प उपमुख्यमंत्री आणि अर्थमंत्री देवेंद्र फडणवीस यांनी आज मांडताच पुण्यातील सारसबाग समोरील शिवसेना भवना समोर शिवसेना शहर प्रमुख नाना भानगिरे यांच्या नेतृत्वाखाली पेढे आणि फटाके वाजवून जल्लोष साजरा करण्यात आला. तर यावेळी नागरिकांना पेढे देखील वाटले. पुणे शहर आणि जिल्ह्याच्या विकासाच्या दृष्टीने भरीव अशी तरतूद करण्यात आली आहे. त्यामध्ये प्रामुख्याने भिडेवाडा उभारणे. स्वारगेट ते कात्रज मेट्रो प्रकल्प, रिंग रोड, नाशिक पुणे हाय स्पीड रेल्वे सुरू करणे. सारथी संस्थेचा विस्तार करणे आणि बालेवाडी येथे स्पोर्ट सायन्स सेंटरची उभारणी करणे. यासह अनेक प्रकल्पांना भरीव अशी तरतूद करण्यात आली आहे. त्यामुळे राज्य सरकारचे आभार व्यक्त करण्यासाठी जल्लोष साजरा करण्यात आल्याचे त्यांनी यावेळी सांगितले.
यावेळी नाना भानगिरे म्हणाले की, मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या नेतृत्वाखाली राज्यात सरकार येऊन सात महिन्याचा कालावधी होऊन गेला आहे. त्या दरम्यान अनेक विकास काम सरकारने केली असून आज राज्यातील प्रत्येक घटक डोळ्यासमोर ठेवून आजचा अर्थसंकल्प उपमुख्यमंत्री देवेंद्र फडणवीस यांनी मांडला आहे.त्यामध्ये पुणे शहर आणि जिल्ह्याच्या विकासाच्या दृष्टीने भरीव अशी तरतूद करण्यात आली आहे.
अर्थसंकल्पात पुणे जिल्ह्याला कोणत्या घोषणा केल्या…
पुणे मेट्रोसाठी सध्या 8313 कोटींची कामे प्रगतीपथावर असून पुणे मेट्रोच्या पिंपरी-चिंचवड ते निगडी कॉरिडॉर आणि स्वारगेट ते कात्रज मेट्रोला मान्यता
नाशिक-पुणे हायस्पीड रेल्वेला निधी
पुरंदर येथे नवीन आंतरराष्ट्रीय विमानतळ
पुणे रिंगरोडसाठी भरीव निधीची तरतूद
डेक्कन कॉलेज पदव्युत्तर व संशोधन संस्था, पुणे आणि कॉलेज ऑफ इंजिनिअरींग पुणे ला विशेष निधी
मानसिक अस्वास्थ आणि व्यसनाधीनतेची वाढती समस्या पाहता जालना, भिवंडी, पुणे, नागपूर येथे नवीन व्यसनमुक्ती केंद्रे
राज्यात 6 सर्क्युलर इकॉनॉमी पार्क तयार केले जाणार. नागपूर, एमएमआर, छत्रपती संभाजीनगर, नाशिक, रत्नागिरीसह पुण्याचा समावेश
खेळाडूंना प्रोत्साहन देण्यासाठी बालेवाडी पुणे येथे स्पोर्टस सायन्स सेंटर उभारणार पुण्यानंतर आता छत्रपती संभाजीनगर येथे नवीन क्रीडा विद्यापीठ/50 कोटी रुपये देणार
राज्यातील अनेक स्मारकांसाठी विशेष निधी देण्यात आला आहे. त्यामध्ये पुणे जिल्ह्यातील धर्मवीर छत्रपती संभाजी महाराज तुळापूर आणि वढूबुद्रूक स्मारकांसाठी आणि भिडेवाडा (पुणे) येथे ज्ञानज्योती सावित्रीबाई फुले राष्ट्रीय स्मारकासाठी 50 कोटी रुपये निधीची घोषणा
हवाई वाहतुकीला चालना देण्यासाठी एटीएफ मूल्यवर्धित कर 18 टक्के, या योजनेमध्ये रायगड, मुंबईसह पुण्याचा समावेश
