मुंबई : ‘महाराष्ट्र टाइम्स’चे संपादक पराग करंदीकर यांची ‘प्रेस कौन्सिल ऑफ इंडिया’च्या सदस्यपदी नियुक्ती करण्यात आली आहे. याबाबतचे राजपत्र नुकतेच प्रसिद्ध करण्यात आले असून, कौन्सिलच्या अध्यक्ष न्यायमूर्ती रंजना देसाई (निवृत्त) यांनी एका पत्राद्वारे ही नियुक्ती जाहीर केली ,‘प्रेस कौन्सिल’ ही संस्था देशातील मुद्रित माध्यमांचे स्वातंत्र्य अबाधित राखण्यासाठी; तसेच त्यांचा दर्जा सुधारण्यासाठी प्रयत्न करते. या संस्थेचे नेतृत्व सर्वोच्च न्यायालयाचे माजी न्यायमूर्ती करतात. त्याचप्रमाणे त्यावर वृत्तपत्रांचे मालक, संपादक आणि श्रमिक पत्रकारांचे प्रतिनिधी यांचा समावेश असतो. संपादक प्रवर्गातून यापूर्वी ‘मटा’चे माजी संपादक गोविंद तळवलकर यांची कौन्सिलवर नियुक्ती झाली होती. त्यानंतर ४० वर्षांनी आता करंदीकर यांची नियुक्ती झाली आहे. करंदीकर गेली ३३ वर्षे पत्रकारितेमध्ये असून, जानेवारी २०२०पासून ‘मटा’चे संपादक म्हणून कार्यरत आहेत.
