पुणे: पुण्यात पिकतं ते देशभरात पसरतं.. असे म्हणतात खरे, अगदी या उक्तीची आठवण यावी अशी घटना,प्रसंग आज समोर आला आहे, माजी खासदार आणि पुण्यातील बहुजनांना मान्य असलेले भाजपा नेते संजय काकडे यांनी उपमुख्यमंत्री अजितदादा पवार यांची भेट घेऊन त्यांना पुढील वाटचालीसाठी शुभेच्छा दिल्या आहेत. राजकिय क्षेत्रात मित्र आणि कट्टर विरोधक अशा दोन्ही भूमिका वठवलीले नेते भाजपाच्या राजकीय व्यासपीठावर एकत्र दिसले तर धर्मनिरपेक्ष म्हणविणाऱ्या पक्षांची चलबिचल वाढली तर नवल वाटणार नाही. राजकिय चाणक्य म्हणुन ख्याती पावलेल्या नेत्याला चेकमेट करण्यासाठी फडणवीस हे ‘गहरी चाल ‘ चालवून पक्षाला विरोधकांनी दिलेल्या जातीयवादी प्रतिमेच्या चौकटीतून बाहेर काढू पाहतील असा काही राजकीय निरीक्षकांनी अंदाज व्यक्त केला आहे. एकंदरीत पवार:काकडे भेटीने विशेषत्वाने भाजप विरोधी पक्षात चलबिचल वाढणार आहे.
प्रत्यक्षात ही भेट घेतली ते भाजपा नेते संजय काकडे यांनी आपले मत सोशल मीडिया तून व्यक्त केले आहे. त्यांनी नेमके काय म्हंटले आहे ते वाचा त्यांच्याच शब्दात…
आता तर, अजितदादा आमच्यासोबत…
मैत्रीला जागणाऱ्या अजितदादांना शुभेच्छा!
महाराष्ट्राचे उपमुख्यमंत्री अजितदादा पवार यांना आज भेटलो आणि पुढील वाटचालीसाठी शुभेच्छा दिल्या. यानिमित्तानं दोन जुने मित्र पुन्हा नव्याने भेटल्याची प्रचिती आली. आमची मैत्री ही २५ वर्षांपूर्वी पासूनची आहे. १९९७ मध्ये त्यांची आणि माझी ओळख झाली. या ओळखीचं रुपांतर मैत्रीत झालं आणि तेव्हापासून आमचा दोस्ताना कायम आहे.
वास्तविक अजितदादा आणि मी एकाच जिल्ह्यातले, पुण्याचे. आणि त्यात दोघांचे पक्ष व विचारधारा वेगळी. त्यामुळं कायमच आम्हा दोघांना एकमेकांच्या विरोधात पाहिलं गेलं. परंतु, राजकारण सोडलं तर आमच्या दोघात कायम मैत्री राहिली आहे. आणि आता तर, अजिदादांनी आमच्या सोबत येण्याचा निर्णय घेतल्यानं यापुढच्या काळात आमचं राजकारण देखील एकमेकांविरोधात न राहता एकमेकांच्या सोबत राहणार आहे. त्यामुळं पुणे शहर आणि जिल्ह्यात आमचं समीकरण चांगलंच यशस्वी होईल यात शंका नाही.
मैत्रीला सदैव जागणाऱ्यांपैकी अजितदादा आहेत. महाराष्ट्राच्या राजकारणातील हे उमदं व्यक्तिमत्व आता आमच्या म्हणजे भाजपासोबत आहे. त्यामुळं महाराष्ट्राच्या विकासाची घोडदौड आणखी वेगाने होईल यात शंका नाही. आणि त्यासाठी आजच्या भेटीत त्यांना शुभेच्छा दिल्या.
-संजय काकडे (माजी खासदार)
