तुटलेल्या ४०० केव्ही वीजवाहिनीची दुरुस्ती सुरू
पुणे, दि. ०८ जुलै २०२३: पॉवर ग्रीड कॉर्पोरेशन ऑफ इंडिया लिमिटेडच्या (पीजीसीआयएल) ४०० केव्ही शिक्रापूर ते तळेगाव अतिउच्चदाबाची एक वीजवाहिनी तुटल्याने शनिवारी (दि. ८) सकाळी ९ च्या सुमारास पिंपरी चिंचवड परिसर, शिक्रापूर, उर्से, थेऊर, पेरणे आदी परिसरातील ग्राहकांचा वीजपुरवठा बंद पडला होता. मात्र पावसामुळे विजेची मागणी कमी झाल्यामुळे तुटलेल्या अतिउच्चदाब वीजवाहिनीचा भार इतर वीजवाहिन्यांवर देण्यात आला व भारव्यवस्थापनाद्वारे या सर्वच भागात दुपारी १२.४५ वाजेपर्यंत टप्प्याटप्प्याने वीजपुरवठा सूरु करण्यात आला आहे.
पीजीसीआयएलच्या शिक्रापूर ते तळेगाव ४०० केव्हीच्या अतिउच्चदाबाच्या चारपैकी एक वीजवाहिनी तळेगाव एमआयडीसीजवळ आज सकाळी ९.०३ वाजता तुटली. त्यामुळे सुमारे ३५५ मेगावॅट विजेचे वहन ठप्प झाले होते. मात्र पावसामुळे विजेची मागणी कमी झाल्याने इतर वीजवाहिन्यांवर हा भार देत भारव्यवस्थापनाद्वारे पर्यायी स्वरुपात वीजपुरवठा सुरळीत करण्यात महावितरण व महापारेषणला यश आले. त्यामुळे बाधीत झालेल्या पिंपरी गाव, रहाटणी, पिंपळे सौदागर, काळेवाडी, चिंचवड गाव, वाल्हेकरवाडी, रावेत, देहू रोड, खराडी, जुना मुंढवा, थिटेवाडी, थेऊर, पेरणे, शिक्रापूर, कोरेगाव भिमा, सणसवाडी, कोरेगाव मूळ, रांजणगावचा काही भाग आदी परिसरातील वीजपुरवठा टप्प्याटप्प्याने दुपारी पाऊण वाजता सुरु करण्यात आला. त्यामुळे वीजग्राहकांना मोठा दिलासा मिळाला.
दरम्यान, पॉवर ग्रीडच्या तुटलेल्या अतिउच्चदाब वीजवाहिनीच्या दुरुस्तीचे काम युद्धपातळीवर प्रयत्न सुरू आहे. आज सायंकाळी ५.३० वाजेपर्यंत या वीजवाहिनीच्या दुरुस्तीचे काम पूर्ण होईल. त्यानंतर इतर वाहिन्यांवर देण्यात आलेला वीजभार या वाहिनीवर पूर्ववत देण्यात येईल.
