बांधकाम व्यवसायिकावर गुन्हा दाखल न करणाऱ्या पोलिस अधिकाऱ्यांची चौकशीची सरकारला शिफारस
एका सदनिका खरेदी प्रकरणात बांधकाम व्यावसायिक विरोधात गुन्हा नोंद न करता हलगर्जीपणा केल्याप्रकरणी सहकारनगर पोलीस ठाण्याचे तत्कालीन पोलिस अधिकारी आणि कर्मचारी यांची सविस्तर चौकशी करण्याची शिफारस विभागीय पोलिस प्राधिकरणाने राज्य सरकारला केली आहे.पुणे विभागीय पोलीस प्राधिकरणाचे अध्यक्ष आर. व्ही. जटाले आणि सदस्य बी.जी. गायकर यांनी हे आदेश दिले आहेत.
याप्रकरणी शोभना मोहन डेंगळे (रा. गणेश प्रसाद बिल्डींग, पुण्याईनगर, धनकवडी,पुणे) यांनी सहकारनगर पोलिस ठाण्याचे तत्कालीन पोलिस निरीक्षक अनिल शेवाळे, पोलिस उपनिरीक्षक बापु खेंगरे यांच्या विरोधात पोलिस प्राधिकरणात धाव घेतली होती. संबधित दाखल तक्रारीनुसार, तक्रारदार डेंगळे यांनी बी. डी. कन्स्ट्रक्शनच्या तिसर्या मजल्यावर ११ नंबरचा फ्लॅट खरेदी केला होता. बांधकाम व्यवसायिक यास सांगितल्यानंतर त्यांनी रक्कम भरूनही त्यांना तिसर्या मजल्यावरील फ्लॅट न देता इमारतीच्या पाचव्या मजल्यावर 19 व्या नंबरचा फ्लॅट देण्यात आला होता.
यामुळे तक्रादारांनी संबंधीत भागीदार असलेले बिल्डर बर्गे आणि देशमुख यांच्या विरोधात 31 ऑगस्ट 2019 मध्ये न्यायधिकरनकडे तक्रार दिली होती. तसेच त्यांनी पोलिस उपनिरीक्षक खेंगरे आणि पोलिस निरीक्षक शेवाळे यांची भेट घेतली. परंतु त्यांनी संबंधीत बांधकाम व्यवसायिक विरोधात कोणताही गुन्हा दाखल केला नाही.
दरम्यान, त्यांनी याप्रकरणी प्राधिकरणात पोलिसांनी गुन्हा दाखल न केल्याबाबत रीतसर लेखी तक्रार केली होती. त्यावर प्राधिकारणाने दोन्ही बाजुचा युक्तीवाद ऐकून याबाबतची सविस्तर चौकशी करण्याचे आदेश राज्य सरकारला दिले आहेत. तसेच आदेशाची प्रत गृह विभागाच्या अतिरिक्त सचिवांना व पुणे पोलिस आयुक्तांना याची प्रत देण्यात यावी असे आदेशात सांगण्यात आले आहे.
