आमदार सिद्धार्थ शिरोळे यांची माहिती
पुणे – औंध रोड-खडकी रेल्वे स्टेशन जंक्शन येथे सातत्याने होणारी वाहतूक कोंडी सोडविण्यासाठी आराखडा तयार करण्यात येत असून, त्यातून वाहतूकीचा प्रश्न मार्गी लागेल, अशी माहिती आमदार सिद्धार्थ शिरोळे यांनी आज (मंगळवारी) दिली.
छत्रपती शिवाजीनगर विधानसभा मतदारसंघातील नागरिकांच्या विविध समस्यांविषयी पुणे जिल्हाधिकारी डॉ.राजेश देशमुख यांचेसमवेत बैठक झाली. बैठकीत प्रामुख्याने औंध रोड-खडकी रेल्वे स्टेशन जंक्शन येथील वाहतूक कोंडी सोडविण्यावर चर्चा करण्यात आली.
औंध रोड-खडकी रेल्वे स्टेशन जंक्शन येथे सततची वाहतूक कोंडी होत असते. नागरिकांना या वाहतूक कोंडीचा प्रचंड त्रास होतो. याबाबत नागरिकांच्या अनेक तक्रारी माझ्याकडे आल्या होत्या. मी स्वतः आणि वाहतूक विभागाचे पोलीस उप आयुक्त, पुणे महापालिका पथ विभागाचे अधिकारी, ॲम्युनिशन फॅक्टरीचे अधिकारी, खडकी कॅन्टोन्मेंट बोर्डाचे मुख्य कार्यकारी अधिकारी यांचेसमवेत पाहणी केली होती. त्या ठिकाणी असे निदर्शनास आले होते की, ॲम्युनिशन फॅक्टरी, डिफेन्स इस्टेट ऑफिस, खडकी कॅन्टोन्मेंट बोर्ड, पुणे महापालिका आणि राज्य सरकारचे सार्वजनिक बांधकाम विभाग या सर्वच विभागांमध्ये रस्त्याच्या मालकीबाबत समन्वयाचा अभाव असल्याचे मला आढळले होते, असे आमदार शिरोळे यांनी सांगितले.
ही समस्या सोडविण्यासाठी या सर्व विभागांची एकत्रित बैठक आज घेण्यात आली आणि वाहतूक कोंडी सोडविण्यासाठी तपशीलवार आराखडा तयार करण्यात येणार असून त्यातून लवकरच येथील वाहतूक कोंडी सुटेल, असा विश्वास शिरोळे यांनी व्यक्त केला.
