प्राचीन ग्रामदैवत श्री काळभैरवनाथ मंदिरात चंदन उटी व मोगरा उत्सव 

श्री बहिरोबा देव ट्रस्ट, श्री काळभैरवनाथ मंदिर कसबा पेठ तर्फे आयोजन ; भारतीय वारकरी भजनी मंडळाचा भजन-कीर्तन कार्यक्रम
पुणे : मोग-याच्या सुवासिक फुलांसह संत्री, आंबा, मोसंबी, अननस, सफरचंदासारख्या ५ हजार ५५५ फळांचा महानैवेद्य प्राचीन गामदैवत श्री काळभैरवनाथ मंदिरात दाखविण्यात आला. तब्बल १०० किलो मोग-याच्या सुवासिक फुलांनी मंदिराचा परिसर फुलून गेला होता. तर, भारतीय वारकरी भजनी मंडळाच्या भजन-कीर्तनाच्या सादरीकरणाने वातावरण भक्तीमय झाले. 
निमित्त होते, श्री बहिरोबा देव ट्रस्ट, श्री काळ भैरवनाथ मंदिर तर्फे कसबा पेठेतील पुण्याचे प्राचीन ग्रामदैवत व क्षेत्रपाल श्री काळभैरवनाथ मंदिरात आयोजित वासंतिक चंदन उटी व मोगरा उत्सवाचे. यावेळी भारतीय वारकरी भजनी मंडळाचा भजन-कीर्तन कार्यक्रम देखील झाला. 
श्री काळभैरवनाथ हे पुण्याचे जागृत ग्रामदैवत असून भैरवनाथ मंदिराचे गर्भगृह आणि मध्यगृह हेमाडपंथी बांधणीचे आहे. त्यामुळे मंदिर गाभा-यापासून ते प्रवेशद्वारापर्यंत मोग-याची फुले आणि विविध फळांची आकर्षक सजावट करण्यात आली. मंदिराचे व्यवस्थापन आजपर्यंत लडकत घराण्याकडे असून वर्षभरात विविध उत्सव केले जातात.
कसबे पुणे ही बाराशे वर्षांपूर्वीची पुण्यातील वस्ती. याठिकाणी मुल:, मुक्ता आणि नाग या तीन नद्यांचा पवित्र त्रिवेणी संगम आहे. गाव तेथे मारुती आणि भैरवनाथाचे मंदिर ही आपल्याकडील परंपरा आहे. अशा कसबा पेठेतील पुण्याचे प्राचीन ग्रामदैवत व क्षेत्रपाल श्री काळभैरवनाथ मंदिरात आयोजित मोगरा महोत्सव पाहण्याकरिता भाविकांनी मोठी गर्दी केली.