काळजी करू नका,कसबा आपलाच गड : खासदार बापटांनी दिला मुख्यमंत्र्यांना विश्वास
पुणे -‘खासदार गिरीश बापट हे आमचे जुने मित्र असून, आमची जीवलग मैत्री आहे. त्यांची काल रात्री भेट घेऊन प्रकृतीची विचारपूस केली. आजच्या भेटीने जुन्या आठवणींना उजाळाला मिळाल. ते लवकरच बरे होतील आणि पुन्हा जनसेवेचे काम सुरू करतील,’ असा भावना मुख्यमंत्री एकनाथ शिंदे यांनी पत्रकारांशी बोलताना व्यक्त केल्या.मुख्यमंत्र्यांनी खासदार बापट यांची पुण्यात भेट घेऊन तब्येतीची विचारपूस केली. सध्या कसबा विधानसभा निवडणुकीचे बिगुल वाजले असून, ही जागा जिंकण्यासाठी भाजपसह महायुतीने तयारी केली. त्यात मुख्यमंत्र्यांच्या दौऱ्यात बापट यांच्या भेटीचे कोणतेही नियोजन नसताना अचानक आळंदीहून थेट घोले रोडला मुख्यमंत्री दाखल झाले. त्यामुळे नक्की भेट कशासाठी अशी चर्चा रंगू लागल्या आहेत.
घोले रस्त्यावरील महात्मा फुले संग्रहालयात मुख्यमंत्री शिंदे यांनी बापट यांची भेट घेऊन प्रकृतीची चौकशी केली. त्यावेळी दोघेही जुन्या आठवणीत रंगले होते. खासदार श्रीरंग बारणे, आमदार महेश लांडगे, माजी खासदार शिवाजीराव आढळराव पाटील, माजी मंत्री विजय शिवतारे, किरण साळी आदी उपस्थित होते.बापट यांच्या भेटीत काय चर्चा झाली, असे मुख्यमंत्र्यांना विचारले असता, “मी सदिच्छा भेटीसाठी आलो होतो. मी बोलण्याअधीच बापट यांनी कसबा विधानसभेची चिंता तुम्ही करू नका’, मी इथे बसलोय, सगळे नेटवर्क चांगले आहे,’ असे सांगितले. बापट यांचा प्रवास आणि मैत्री जी जवळून अनुभवली आहे, जनतेचा विश्वास आमच्यावर आहे. त्यामुळे जनता दोन्ही जागांवर आम्हाला निवडून देईल आणि दिवंगत आमदारांच्या मतदारसंघातील राहिलेली अपूर्ण कामे मार्गी लागतील, असे मुख्यमंत्र्यांनी सांगितले.
