पुणे-पुण्यातील एका 48 वर्षीय व्यक्तीने मुलीच्या वैद्यकीय प्रवेशासाठी एका खाजगी सावकाराकडून साडेसात लाख रुपये उधारीवर घेतले होते. त्याबदल्यात 20 लाख 74 हजार रुपयांची परतफेड त्यांनी केलेली होती. मात्र, त्यानंतरही आणखी साडेआठ लाख रुपयांची मागणी करत जीवे मारण्याची धमकी देणाऱ्या खाजगी सावकाराला पोलिसांनी जेरबंद केले आहे.
नीरज कुमार रामचंद्र मंडळ (वय -45, रा.पिंपळे गुरव, पुणे) त्याच्यावर खडकी पोलीस ठाण्यात गुन्हा दाखल करण्यात आला आहे.सदरचा प्रकार मे 2017 ते एप्रिल 2023 यादरम्यान घडला आहे. पोलिसांनी दिलेल्या माहितीनुसार, यासंदर्भात पोलिसांकडे तक्रार दाखल केलेल्या तक्रारदार यांनी त्यांच्या मुलीच्या वैद्यकीय महाविद्यालयातील प्रवेशासाठी आरोपी नीरज कुमार मंडल यांच्याकडून पाच आणि चार टक्के व्याजदराने एकूण सात लाख 50 हजार रुपये घेतले होते.
त्याच्या बदल्यात तक्रारदार यांनी आरोपी जून 2017 ते मे 2022 पर्यंत साडेसात लाख रुपयांच्या मोबदल्यात 13 लाख रुपये रोख व सात लाख 74 हजार रुपये ऑनलाइन स्वरूपात असे एकूण 20 लाख 74 हजार रुपये दिलेले होते. मात्र, त्यानंतरही आरोपी तक्रारदार यास फोन करून त्याच्या घरात आणि ऑफिसमध्ये येऊन शिवीगाळ करून खोट्या गुन्ह्यात अडकवण्याची भीती घालत होता. तसेच त्याला उचलून घेऊन जाण्याचे सांगत जीवे ठार मारण्याची धमकी देत होता. तसेच त्याच्याकडे आणखी आठ लाख 50 हजार रुपयांची मागणी ही आरोपीने केली. त्यामुळे याप्रकरणी तक्रारदार यांनी पोलिसांकडे धाव घेतली आरोपी विरोधात तक्रार दाखल केली. त्यानुसार खडकी पोलिस यांनी आरोपीला अटक केली आहे.याबाबत पुढील तपास पोलीस उपनिरीक्षक एस पाटील करत आहे.
