पुणे-बहुजन समाज पार्टीची ताकद मजबूत तयार करून जास्तीत जास्त आमदार खासदार निवडून आणा, डॉ. बाबासाहेब आंबेडकरांनी केलेला समाजाचा विकास आपण बहुजन समाज पार्टीच्या माध्यमातून पुढे चालवू या , असे आवाहन बहुजन समाज पार्टीचे महाराष्ट्र प्रभारी सुरेश साखरे यांनी केले .
पुणे स्टेशनजवळील रमाई आंबेडकर रोड (ताडीवाला रोड)येथे सभागृहात बहुजन समाज पार्टीच्यावतीने पश्चिम महाराष्ट्रामधील कार्यकर्ता मेळावा संपन्न झाला . त्यावेळी ते बोलत होते .या मेळाव्यास बहुजन समाज पार्टीचे महाराष्ट्र प्रभारी प्रमोद रैना , ना. तू. खंदारे , ऍड. संजीव सदाफुले , महाराष्ट्र प्रदेश सचिव संजय वाघमारे , काळुराम चौधरी , पश्चिम महाराष्ट्राचे प्रभारी बापूसाहेब कुदळे , महाराष्ट्र प्रदेश सचिव किरण आल्हाट , पुणे जिल्हा अध्यक्ष बाळासाहेब आवारे , पुणे शहर अध्यक्ष सुदीप गायकवाड , सातारा जिल्हा अध्यक्ष आनंद थोरवडे , सांगली जिल्हा अध्यक्ष शंकर माने , कोल्हापूर जिल्हा अध्यक्ष अजय कुरणे ,अहमदनगर जिल्हा अध्यक्ष उमाशंकर यादव आदी मान्यवर पदाधिकारी व कार्यकर्ते मोठ्या संख्येने उपस्थित होते . बहुजन समाज पार्टीचे महाराष्ट्र प्रभारी सुरेश साखरे यांनी सांगितले कि, देशाचे संविधान बदलण्यासाठी प्रयत्न सुरु आहेत परंतु , हे प्रयत्न अयशस्वी करण्यासाठी बहन मायावती यांना पंतप्रधान करण्यासाठी आपण सर्वानी एकजूटीने बहुजन समाज पार्टीचे काम एकदिलाने केले पाहिजे . बहुजन समाज पार्टीने स्वाभिमानी नेर्तृत्व तयार केले . परंतु आपले काही लोक अन्य राजकीय पक्षाचे चमचे झाले तेव्हापासून समाज हा विकासापासून वंचित राहिला . त्यासाठी बहुजन समाज पार्टीच्या कार्यकर्त्यांनी सेक्टर बूथ जोमाने तयार करा . ज्याचे खाऊ मटण त्याचे दाबू बटण अशी चूक बहुजनांनी करू नये . त्यासाठी पुण्यातून बहुजन समाज पार्टीचा खासदार व आमदार निवडून आणण्यासाठी कामाला लागावे.असे आवाहन त्यांनी केले.
यावेळी बहुजन समाज पार्टीचे महाराष्ट्र प्रभारी प्रमोद रैना यांनी देखील मार्गदर्शन केले . मेळाव्याचे प्रास्ताविक बहुजन समाज पार्टीचे महाराष्ट्र प्रदेश सचिव किरण आल्हाट यांनी केले तर सूत्रसंचालन पुणे शहर अध्यक्ष सुदीप गायकवाड यांनी केले आभार पुणे जिल्हा अध्यक्ष बाळासाहेब आवारे यांनी मानले .
