मुंबई-‘बटेंगे तो कटेंगे’ला सर्वांचाच विरोध आहे हे आम्हाला मान्य नाही. पंकजा मुंडेंनीही याला विरोध केला असे मी ऐकले. प्रत्येकाची विचारधारा वेगळी असते, पण हा महाराष्ट्र आहे इथे असे चालणार नाही, असे म्हणत राष्ट्रवादी काँग्रेसचे नेते अजित पवार यांनी घोषनेला विरोध केला आहे.
अजित पवार पुढे बोलताना म्हणाले की, लोकसभा निवडणुकीत संविधान बदलण्यासाठी 400 पारचा पारा दिला गेला. विरोधकांनी फेक नरेटिव्ह बनवला, असे अजितदादांनी म्हटले आहे. राज्यात 2 कोटी 30 लाख महिलांना लाडकी बहिण योजनेचा लाभ मिळाला आहे, असेही त्यांनी एका वृत्तवाहिनीला दिलेल्या मुलाखतीमध्ये म्हटले आहे.
अजित पवार म्हणाले की, बारामती विधानसभा मतदारसंघात आमच्या पक्षाने पहिले मला उमेदवारी जाहीर केली. त्यानंतर युगेंद्र पवार यांना त्यांच्या पक्षाने उमेदवारी जाहीर केली. मतदारसंघात कुणाला उमेदवारी द्यायची तो निर्णय पक्षाचा असतो. त्यावर मी काही जास्त बोलणार नाही. कोणीही निवडणूक लढवू शकते. लोकसभा निवडणुकीच्या वेळी मी उमेदवार देऊन चुकी केली हे मी मान्य करतो. पण आता कोणी काय केले ह्यात मी पडणार नाही. त्यावर लोकं निर्णय घेतील.अजित पवार म्हणाले की, शरद पवार यांच्याशी गेली अनेक महिने चर्चा झाली नाही. ते त्यांच्या कामात व्यग्र असतात मी माझ्या कामात व्यग्र असतो. मी शरद पवार यांच्यासोबत जाईल अशा अनेक अफवा पसरवल्या जातात. त्यांच्या मागे नेमके कोण आहे, हे पाहणं महत्त्वाचे आहे.
अजित पवार म्हणाले की, एक है तो सेफ है म्हणजे राज्यातील सर्वच लोकं असा मी त्यांचा अर्थ घेतला आहे. नरेंद्र मोदी यांच्या कार्यक्रमाला आम्ही गेलो नाही, प्रत्येकच ठिकाणी जाणं होतेच असे नाही. पुण्यात जी सभा झाले त्यावेळी 6 उमेदवार नव्हते, मग सना, आणि सिद्दीकी त्यांच्यासभेत गेले नाही तर त्यात एवढे काय? प्रत्येकांचा बघण्याचा दृष्टीकोन वेगळा असतो. पंतप्रधान नरेंद्र मोदी यांच्या सभेला त्या त्या भागातील आमचे नेते उपस्थित राहतात.
