पुणे- पुण्यातील ८ पैकी कोथरूड या मतदार संघातील भाजप उमेदवार चंद्रकांतदादा पाटील हे विक्रमी मतांनी विजयी होतील असा विश्वास येथे केंद्रीय मंत्री मुरलीधर मोहोळ यांनी व्यक्त केला आहे. कोथरुड विधानसभा मतदारसंघातील भाजपा-महायुतीच्या पदाधिकाऱ्यांच्या संयुक्त बैठकीला संबोधित केले. कोथरुड हा भारतीय जनता पार्टी-महायुतीचा बालेकिल्ला असून या विधानसभा निवडणुकीतही मोठा विजय मतदारांच्या आशीर्वादाने होणार आहे. प्रचाराचे नियोजन, अधिकाधिक मतदारांपर्यंत पोहोचणे, सरकारची कामगिरी मतदारांपर्यंत पोहोचणे अशा विविध मुद्द्यांवर चर्चा झाली.बैठकीस उमेदवार श्री. चंद्रकांतदादा पाटील, भाजपा शहराध्यक्ष धिरज घाटे, राष्ट्रवादीचे शहराध्यक्ष श्री. दीपकभाऊ मानकर, आरपीआयचे शहराध्यक्ष श्री. संजय सोनावणे, शिवसेनेचे श्री. किरण साळी यांच्यासह कोथरुड विधानसभेतील महायुतीच्या घटक पक्षांचे पदाधिकारी उपस्थित होते.
चंद्रकांत पाटील यांच्यासाठी २०१९च्या विधानसभेला भाजपच्या स्टँडिंग आमदार मेधा कुलकर्णी यांच्या ऐवजी पाटील यांना उमेदवारी देण्यात आली होती . त्यानंतर मेधा कुलकर्णी यांना राज्यसभेवर संधी देण्यात आली तर याच मतदारसंघातील मुरलीधर मोहोळ केंद्रात राज्यमंत्री झाले.सुरुवातीला बंडाचा झेंडा हाती घेतलेले माजी नगरसेवक अमोल बालवडकरही आता चंद्रकांत पाटील यांच्या प्रचारात सक्रिय झाले आहेत. त्यामुळे पक्षांतर्गत कलहाचा मुद्दा मागे पडला असून आता शिवसेनेचे मोकाटे आणि मनसेचे शिंदे पाटील यांच्या विरोधात लढत देत आहेत चंद्रकांत मोकाटे यांनी यापूर्वीही या मतदारसंघाचं नेतृत्व केलेलं आहे. मनसेने किशोर शिंदे यांना पुन्हा मैदानात उतरवले असून किशोर शिंदे २०१९ ला पराभूत झाले होते .तेव्हा दुरंगी झालेली लढत यंदा तिरंगी होणार असून या लढतीमुळे मोठ्या प्रमाणात मतांचे विभाजन होणार आहे. या विभाजनाचा फटका महाआघाडीला बसणार आहे. एकेकाळी कोथरूड हा शिवसेनेचा बालेकिल्ला होता. आता तो भाजपचा बालेकिल्ला बनला असून भाजपचे दोन खासदार या मतदारसंघात आहेत.
