मुंबई:राज ठाकरे यांनी गॅलरीत बघून बोलू नये, त्यांनी सभागृहात, मुख्य मैदानात काय चालले आहे, यावरून बोलावे. शिवसेना ही बाळासाहेब ठाकरेंची होती. तर हीच शिवसेना एकनाथ शिंदेंच्या घशात घालणारे मोदी – शहा कोण? असा प्रश्न राज ठाकरे यांनी उपस्थित करायला हवा होता. असे म्हणत उद्धव ठाकरे गटाचे खासदार संजय राऊत यांनी राज ठाकरे यांच्यावर टीका केली आहे. राज ठाकरे मोदी शहांची तळी उचलत असल्याचा आरोप त्यांनी केला. राज ठाकरेंनी यावर बोलायला हवे, असे देखील राऊत यांनी म्हटले आहे.शिवसेना कोणाची हे सांगण्यासाठी राज ठाकरे यांच्या प्रमाणपत्राची आवश्यकता नसल्याचे संजय राऊत यांनी म्हटले आहे. आज राज ठाकरे फडणवीस, अमित शहा आणि मोदी यांना आपले नेते मानतात. त्यांनीच ही बाळासाहेब ठाकरेंची प्रॉपर्टी बेकायदेशीरपणे एकनाथ शिंदे यांना दिली आहे. त्याच भारतीय जनता पक्षाचा मुख्यमंत्री आपण महाराष्ट्रात करायला निघाला आहात? अशी टीका राऊत यांनी राज ठाकरे यांच्यावर केली. राज ठाकरे यांना बाळासाहेब ठाकरे कधीही माफ करणार नाही, अशा शब्दात राऊत यांनी राज ठाकरे यांच्यावर निशाणा साधला. राज ठाकरे हे मोदी आणि शहा यांच्या पालख्या वाहत असल्याचे देखील संजय राऊत यांनी म्हटले आहे.
राज ठाकरे हे मूळ मुद्दा सोडून बोलत आहेत. राज ठाकरे काय बोलतात, यावर महाराष्ट्र चालत नाही. राज ठाकरे यांना महाराष्ट्रात भाजपचा मुख्यमंत्री करायचा आहे. आणि तोच महाराष्ट्राचा शत्रू असल्याचे संजय राऊत यांनी म्हटले आहे. त्यामुळे राज ठाकरे काय बोलतात, याकडे जास्त लक्ष देण्याची आवश्यकता नसल्याचेही त्यांनी म्हटले आहे.
दादर, माहिम, प्रभादेवी हा भाग शिवसेनेचा बालेकिल्ला आहे. या मतदारसंघांमध्ये शिवसेनेचे उमेदवार सावंत हे दहा ते पंधरा हजार मतांनी विजयी होणार असल्याचा दावा संजय राऊत यांनी केला आहे. या मतदार संघात राज ठाकरे यांचे पुत्र अमित ठाकरे हे निवडणूक लढवत आहेत. त्यांचा परभव होणार असल्याचा दावाही राऊत यांनी केला आहे.
