पुणे- मला आमदार व्हायचंय असे जवळपास कित्येक टर्म सांगत आणि आयत्यावेळी राष्ट्रवादीला मतदार संघ सुटल्याने माघार घेत गेली ४० वर्षे नगरसेवक पदावरच उत्कृष्ट काम करत राहिलेले कॉंग्रेसचे नेते आबा बागुल आता आपल्या राजकीय कारकिर्दीत टोकाच्या भूमिकेला पोहोचू शकतील असे चित्र आहे.बागुल यांनी गेली ३ दिवस मुंबईत तळ ठोकला आहे. कॉंग्रेस नेत्यांच्या समवेत त्यांनी शरद पवारांच्या राष्ट्रवादीच्या नेत्यांच्या भेटीगाठी घेत आपण किती वर्षे नगरसेवक म्हणूनच काम करायचे ? आपल्याला आमदारकीची संधी देणार आहात कि नाही ? असा प्रश्न विचारायला सुरुवात केली आहे. काल ते राष्ट्रवादीच्या जयंत पाटलांना भेटले तर आज सकाळी देखील त्यांनी भेटी गाठी सुरु केल्याचे वृत्त आहे.
पर्वती मतदार संघ नेहमी राष्ट्रवादीला कॉंग्रेसने आघाडी करताना सोडला आहे. येथून गेली ३ टर्म भाजप उमेदवार निवडून येत आहेत.आता सध्या भाजपा बद्दल नाराजी असल्याचे यावेळी निवडूनच येईल असे आबा बागुल असल्याचा दावा बागुल यांच्या समर्थकांच्या कडून केला जातोय.बागुल यांनी गेल्या लोकसभेला कॉंग्रेस पक्षाकडे उमेदवारी मागितली होती मात्र त्यांना उमेदवारी डावलून रवींद्र धंगेकर यांना देण्यात आली तेव्हा बागुल यांना तुम्हाला आमदारकीची संधी देऊ असे आश्वासन पक्षातील वरिष्ठ नेत्यांनी दिले होते.विधानपरिषद तर त्यांना दिली गेली नाहीच आता ते वारंवार प्रयत्न करत असलेल्या पर्वती मतदार संघातून राष्ट्रवादी शरद पवार गट आपल्या निष्ठावंत आणि जनसंपर्काने मतदार संघ भक्कम बांधलेल्या अश्विनी नितीन कदम यांना डावलून बागुलांच्या साठी पर्वती सोडणार कि नाही हे आता लवकरच समजणार आहे.राजकीय क्षेत्रात पर्वतीत कमळाच्या विरोधात तुतारी फुंकणार कि पंजा लढणार याबाबत आता उत्सुकता ताणली जाऊ लागली आहे.
पुणे शहर राष्ट्रवादी शरद पवार गटाचे शहर अध्यक्ष प्रशांत जगताप यांनी मात्र निष्ठावंत आणि निवडून येण्याची क्षमता असणाऱ्यांनाच उमेदवारी दिली गेली पाहिजे असा आग्रह धरला आहे. वंदना चव्हाण आणि अन्य नेत्यांनी हा निर्णय शरद पवार आणि सुप्रिया सुळे घेतील असे म्हटल्याचे वृत्त आहे.
