मुंबई–माजी मंत्री आणि राष्ट्रवादी काँग्रेस अजित पवार गटाचे नेते बाबा सिद्दिकी यांची गोळ्या झाडून हत्या करण्यात आली. बाबा सिद्दिकींच्या हत्येनंतर केंद्रीय सुरक्षा यंत्रणा सावध झाली असून राज्यातील आढावा घेतला. यानंतर राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांना झेड प्लस सुरक्षा देण्याबाबत निर्णय घेतला असल्याचे बोलले जात आहे. यासाठी सुरक्षा यंत्रणा शरद पवार यांच्याशी संपर्क साधणार आहे. दरम्यान, केंद्रीय यंत्रणांनी यापूर्वीही शरद पवारांना झेड प्लस सुरक्षा प्रदान केली होती, पण तेव्हा शरद पवारांनी सुरक्षा नाकारली होती.
काही दिवसांपूर्वी बाबा सिद्दिकी यांची वांद्रे पूर्व येथे रात्रीच्या सुमारास गोळ्या झाडून हत्या केली होती. बिश्नोई टोळीने या हत्येची जबाबदारी स्वीकारली होती. विधानसभा निवडणुकांच्या आधी घडलेल्या या घटनेमुळे राजकीय वर्तुळात खळबळ उडाली होती. या घटनेमुळे केंद्रीय यंत्रणा सज्ज झाल्या असून त्यांनी राज्यातील सुरक्षेचा आढावा घेतला आहे.
या दरम्यान, केंद्रीय यंत्रणांकडून खासदार शरद पवार यांना झेड प्लस सुरक्षा घेण्याबाबत विनंती केली आहे. मात्र, शरद पवारांना धोका काय आहे? याबाबत कोणतही माहिती समोर आली नाही. फक्त शरद पवारांनाच या धोक्याबाबत माहिती देण्यात आल्याचे म्हटले जात आहे. त्यामुळे झेड प्लस सुरक्षाबाबत शरद पवार काय निर्णय घेतात, हे पहावे लागणार आहे.केंद्र सरकारने याआधी देखील झेड प्लस सुरक्षा दिली होती. मात्र, शरद पवार यांनी या सुरक्षेबाबत संशय व्यक्त करत ती सुरक्षा घेण्यास नकार दिला होता. झेड प्लस सुरक्षा म्हणजे निवडणुकीच्या काळात खात्रीलायक माहिती मिळवण्याची व्यवस्था असू शकते, असे शरद पवार त्यावेळी म्हणाले होते.
