पुणे- लोणीकंद याठिकाणी प्रकल्पाच्या विकासासाठी गुंतवणूक घेऊन व्यवसायिकाची तब्बल 94 कोटी 49 लाख 44 हजार रुपयांची आर्थिक फसवणूक करण्यात आल्याचा प्रकार उघडकीस आला आहे. याप्रकरणी रवी राज सक्सेना यांनी सर्बिबिया असोसिएट ट्रस्ट पुणे यांच्यातर्फे लोणीकंद पोलिस ठाण्यात तक्रार दाखल केली आहे, अशी माहिती पोलिसांनी शुक्रवारी दिली.
सदर तक्रारीनुसार, पोलिसांनी एस एस जी रियालिटी अँड इन्फ्राचे भागीदार प्रणय प्रकाश सिंघी ( राहणार -मोहम्मदवाडी ,पुणे ), सुशील एकनाथ घुले (राहणार -हडपसर ,पुणे ),अभिजीत वसंत शेंडे ,सौरभ एकनाथ घुले आणि विनय प्रकाश सिंघी व इतर आरोपींवर आर्थिक फसवणुकीचा गुन्हा दाखल केला आहे .सदरची घटना जानेवारी 2015 ते 22 /7/ 2023 यादरम्यान घडली आहे. पोलिसांनी दिलेल्या माहितीनुसार ,तक्रारदार रवी सक्सेना व इतर गुंतवणूकदार यांचा बांधकाम व्यवसाय आहे. आरोपींनी त्यांच्या प्रकल्पातील फ्लॅट खरेदी धारकांकडून 62 कोटी व वित्तीय फर्मकडून 25 कोटी रुपये कर्ज स्वरूपात घेतले. परंतु, पाच वर्षापासून सदर प्रकल्प पूर्ण केलेला नाही. त्यांना सदर प्रकल्पाकरीता घेतलेल्या एकूण 87 कोटी कर्ज रकमेपैकी केवळ 30 ते 35 कोटी रुपये बांधकामा करीता वापरले असून रेराद्वारे खरेदीदरांची खोटी मुदतवाढ घेऊन चुकीच्या पद्धतीने बांधकाम पूर्ण करून खरेदीदारंची फसवणुक केली आहे. याबाबत पुढील तपास गुन्हे शाखेचे आर्थिक गुन्हे शाखेचे सहाय्यक पोलीस निरीक्षक संतोष डांगे करत आहे अशी माहिती पोलिसांनी दिली आहे.
