मुंबई-शिवसेना खासदार संजय राऊत यांनी भाजप प्रदेशाध्यक्ष चंद्रशेखर बावनकुळे यांचा जुगार खेळत असल्याचा फोटो शेअर केल्यामुळे राज्याच्या राजकारणात एकच खळबळ माजली आहे. त्यात आता भाजपनेही आदित्य ठाकरेंचा एक ‘ड्रिंक’ घेत असल्याचा फोटो ट्विट करत ठाकरे गटाला जशास तसे प्रत्युत्तर देण्याचा प्रयत्न केला आहे. ‘आदित्य ठाकरे यांच्या ग्लासमध्ये कोणत्या ब्रँडची व्हिस्की आहे?’ असा सवाल भाजपने या प्रकरणी केला आहे.
संजय राऊत यांनी सोमवारी भाजप प्रदेशाध्यक्ष चंद्रशेखर बावनकुळे यांचा एक फोटो ट्विट केला. या फोटोमध्ये बावनकुळे कथितपणे जुगार खेळताना दिसून येत आहेत. अवघा महाराष्ट्र पेटलेला असताना हे महाशय मकाऊ येथील कॅसिनोत जुगार खेळत आहेत, असे राऊत यांनी या प्रकरणी म्हटले आहे. त्यांच्या या ट्विटनंतर राजकीय वर्तुळात आरोप – प्रत्यारोप सुरू झालेत.
ग्लासमध्ये कोणत्या ब्रँडची व्हिस्की?
भाजपने या प्रकरणी आदित्य ठाकरे यांचा कथितपणे मद्य सेवन करतानाचा एक फोटो ट्विट करत ठाकरे गटाला जशास तसे प्रत्युत्तर देण्याचा प्रयत्न केला आहे. या फोटोमध्ये आदित्य ठाकरे सुप्रसिद्ध फुटबॉलपटू डेव्हीड बेकहॅम यांच्यासोबत आदित्य ठाकरे दिसून येत आहेत. त्यात ते काहीतरी पित असल्याचे दिसून येत आहे. भाजपने हा फोटो ट्विट करताना म्हटले की, आमचे प्रदेशाध्यक्ष चंद्रशेखरजी बावनकुळे त्यांच्या आयुष्यात कधी जुगार खेळलेले नाहीत. ते ज्या हॉटेलमध्ये सहकुटुंब मुक्कामी थांबलेत, हा तेथील परिसर आहे. असो, ज्यांच्या आयुष्याचा जुगार झालाय, त्यांची दृष्टी त्यापलिकडे जाऊ शकत नाही. आम्हाला फक्त एक सांगा संजुभाऊ, आदित्य ठाकरे यांच्या या ग्लासमध्ये कोणत्या ब्रँडची व्हिस्की आहे?
