पुणे: हॅन्ड सर्जरीवर पुण्यातील भांडारकर प्राच्यविद्या संशोधन संस्थेच्या सभागृहात तीन दिवसीय राष्ट्रीय परिषदेचे आयोजन करण्यात आले आहे. जगप्रसिद्ध हॅन्ड सर्जन डॉ. पंकज जिंदल यांच्या पुढाकारातून येत्या २६, २७ व २८ जुलै २०२४ या दिवशी होणाऱ्या परिषदेत देशभरातील डॉक्टर एकत्र येणार आहेत.
या परिषदेत हॅन्ड सर्जरीशी संबंधित विविध विषयांची सखोल चर्चा होणार आहे. हाताच्या दुखापतींचे व्यवस्थापन, शस्त्रक्रिया, फ्रॅक्चर्स यातील गुंतागुंत, जन्मतःच असलेल्या हॅन्ड डिफॉर्मिटी (हाताचे विकृती) आणि अपघातांमुळे झालेल्या विकृती, अंगठ्यांची पुनर्स्थापना, जळण्यांमुळे आणि इजा झालेल्या हाताच्या कॉन्ट्रॅक्चर्स (कठीणपणा) यांचे निराकरण आणि कापलेल्या अंगठ्यांची पुनर्निर्मिती यावर चर्चा केली जाईल.
या तीन दिवसांमध्ये जवळपास ८० विषयांवर सखोल विचारमंथन होणार आहे. हॅन्ड सर्जरीमधील तज्ज्ञांकडून शिकण्याची, त्यांच्या अनुभवांचा आदान-प्रदान करण्याची आणि हॅन्ड सर्जरीतील नवीनतम प्रगतींचा अभ्यास करण्याची अनोखी संधी मिळेल. त्यामुळे हॅन्ड सर्जरी व त्यासंबंधित आजारांचे व्यवस्थापन करणाऱ्यांसाठी ही परिषद महत्वपूर्ण ठरेल.हॅन्ड सर्जरी इंडिया, इंडियन ऑर्थोपेडिक असोसिएशन, महाराष्ट्र ऑर्थोपेडिक असोसिएशन, पुणे ऑर्थोपेडिक सोसायटी आणि पिंपरी-चिंचवड ऑर्थोपेडिक असोसिएशन या संस्थांच्या संयुक्त विद्यमाने या तीन दिवसीय राष्ट्रीय परिषदेचे आयोजन केले आहे, अशी माहिती डॉ. पंकज जिंदल यांनी दिली.
