कामगार नेते रघुनाथराव कुचिक
पुणे : भागवत संप्रदाय अर्थात वारकरी संप्रदायाने पंढरपूर च्या वाळवंटात सर्व समाज घटकातील संताना एकत्र आध्यात्मिक लोकशाहीची स्थापना करत समता, बंधुता व मानवता या मूल्यांची अनमोल भेट समाजाला दिली. वारकरी संप्रदायाच्या याच समाजहितैशी मूल्यांचे संत चोखामेळा समता पुरस्कार प्राप्त व्यक्तीमत्वाच्या कार्यात दर्शन घडते आहे . असे प्रतिपादन पुढे बोलतांना कामगार नेते रघुनाथराव कुचिक यांनी केले .संत चोखामेळा अध्यासन केंद्र व वृंदावन फाऊंडेशन पुणे यांच्या वतीने संत चोखामेळा महाराज यांच्या ६८६ व्या पुण्यतिथी संजीवन समाधी दिन निमित्ताने आयोजित संत चोखामेळा समता समता पुरस्कार वितरण सोहळ्यात विशेष अतिथी म्हणून ते बोलत होते . वारकरी संतांनी कृतीशील आचरणाद्वारे सांगितलेल्या सामाजिक एकता , बंधुभाव अन मानवतावादी मूल्यांना केंद्रस्थानी मानून सामाजिक एकतेसाठी अविरतपणे कार्यरत असलेले संत चोखामेळा महाराज जन्मभूमी मेहुणाराजा जि बुलढाणा येथील संत चोखामेळा जन्मोत्सव सोहळ्याचे प्रणेते माजी आमदार हर्षवर्धन सपकाळ ( बुलढाणा ) व संत विचारांचा जागर आधुनिक माध्यमाद्वारे अधिक समर्थपणे करणारे लोकप्रिय कीर्तनकार प्रवचनकार महंत ह भ प पुरुषोत्तमदादा पाटील (आळंदी ) यांना संत चोखामेळा समता पुरस्कार देउन ह भ प दिपकजी महाराज व रघुनाथराव कुचिक यांच्या हस्ते सन्मानचिन्ह , सन्मानपत्र ,शाल , पुष्पगुच्छ , श्रीफळ देऊन सन्मानित करण्यात आले. कार्यक्रमाच्या अध्यक्षस्थानी सावित्रीबाई फुले , पुणे विद्यापीठ पुणे च्या संत ज्ञानदेव , संत नामदेव व संत तुकाराम अध्यासनाचे समन्वयक प्रो .डॉ. ओम श्रीश श्रीदत्तोपासक होते . याप्रसंगी प्रमुख पाहुणे म्हणजे ज्येष्ठ विचारवंत , माजी खासदार प्रो .डॉ. सुनीलराव गायकवाड , उपस्थित होते . उद्योजक अण्णासाहेब वावरे , साहित्यिक श्यामसुंदर मुळे आदी मान्यवर उपस्थित होते .
ज्येष्ठ गांधीवादी आ.हर्षवर्धन सपकाळ बुलढाणा जिल्हा परिषदेचे अध्यक्ष असतांना त्यांच्याच संकल्पनेतुन संत चोखामेळा जन्मोत्सव सोहळ्याची बुलढाणा जिल्हा परिषद यांच्या वतीने मेहुणाराजा येथे सुरुवात झाली , यास यावर्षी २५ वर्षे पूर्ण झाली. सपकाळ यांनी आत्यंतिक श्रद्धेने सुरु केलेला जन्मोत्सव सोहळा आज मोठया प्रमाणात साजरा होतो. प्रतीवर्षी राज्यातील चोखामेळा भक्त , अभ्यासक संशोधक या सोहळ्यास हजेरी लावतात , संत चोखामेळा जन्मोत्सव सोहळा सोबतच संत चोखामेळा महाराज व कुटूंबातील अन्य संतांच्या विचार संवर्धन उत्कर्ष कार्यात सपकाळ सक्रिय असतात त्यांच्या संत चोखामेळा यांच्या विचार प्रसार कार्याबद्दल त्यांना संत चोखामेळा समता पुरस्कार देऊन सन्मानित करण्यातआले . सोबतच वारकरी संप्रदायातील लोकप्रिय कीर्तनकार प्रवचनकार ह भ प श्री महंत पुरुषोत्तम दादा पाटील आळंदीकर हे आधुनिक माध्यमाद्वारे वारकरी विचारांचा सातत्याने प्रचार प्रसार करत असतात , तरुण पिढीस समजेल अशा साध्या सोप्या भाषेतील मांडणीद्वारे ते संत विचार घेउन प्रबोधन करत आहेत . संत चोखामेळा समता पुरस्कार देउन ह भ प पुरुषोत्तम पाटील यांनाही सन्मानित करण्यात आले . पाटील महाराज हे आळंदी येथील श्री सद्गुरु अमृता स्वामी मठाचे विद्यमान मठाधिपती आहेत तसेच झी टॉकीज वरील कीर्तन मालिका गजर कीर्तनाचा सोहळा आनंदाचा व मन मंदिरा गजर भक्तीचा या कार्यक्रमाचे प्रमुख सल्लागार आहेत . ह भ प पुरुषोत्तमदादा पाटील यांना आध्यात्मिक तर आ. हर्षवर्धनदादा सपकाळ यांना सामाजिक गटातून संत चोखामेळा समता पुरस्कार देऊन सन्मानित करण्यात आले . कार्यक्रमाचे प्रास्ताविक संत चोखामेळा अध्यासनाचे संस्थापक सचिन पाटील यांनी तर आभार ह भ प वसंतराव आण्णा पवार महाराज यांनी तर निवेदन ज्येष्ठ विश्वस्त ह भ प प्रसाद माटे महाराज यांनी केले . वारकरी संतांनी सांगितलेल्या मार्गाने जनसेवेच्या कार्यात प्रामाणिकपणे गढून गेलेल्या व्यक्तीमत्वाच्या गौरव सोहळ्यास मुंबई , पुणे , सोलापूर , बुलढाणा ,सातारा , धाराशिव लातूर आदी जिल्ह्यातून संत चोखामेळा प्रेमी उपस्थित होते .