राज्यसभेसाठी राष्ट्रवादी काँग्रेसकडून सुनेत्रा पवार यांचे नाव जाहीर करण्यात आले आहे. राज्यसभेच्या जागेसाठी मंत्री छगन भुजबळ इच्छुक होते. मात्र पक्षाने सुनेत्रा पवार यांना उमेदवारी देण्याचा निर्णय घेतला, पक्षाचे निर्णय मान्य करावे लागतात असे, मंत्री छगन भुजबळ यांनी म्हटले आहे. दरम्यान, सुनेत्रा पवार यांनी अजित पवार यांच्या उपस्थितीत आपला उमेदवारी अर्ज दाखल केला आहे.
छगन भुजबळ पुढे बोलताना म्हणाले की, प्रत्येक गोष्ट तुमच्या मनाप्रमाणे होत नाही. पक्षाचा निर्णय सर्वांना मान्य करावा लागतो. मीसुद्धा राज्यसभा लढण्यासाठी इच्छुक होतो. पण सुनेत्रा पवारांना उमेदवारा देण्याचा निर्णय झाला. पक्षात चर्चेनंतर हा निर्णय घेतला गेला. माझ्या तोंडावर दिसतंय का नाराज आहे? मी नाराज नाहीय, पक्षात सर्वांनी मिळून निर्णय घ्यायचे असतात.
बिनविरोध निवडणूक होईल
छगन भुजबळ यांनी म्हणाले की, या जागेसाठी माझ्यासह आनंद परांजपे हे देखील इच्छुक होते. मात्र आमच्या पक्षातील कोअर कमिटीच्या आम्ही सर्व सदस्यांनी मिळून सुनेत्रा पवार यांना उमेदवारी देण्याविषयी निर्णय घेतला. यामध्ये अजितदादांचा काहीही संबंध नाही. एक जागा असल्यामुळे इच्छुक असलेल्या सर्वांनाच उमेदवारी देणे शक्य नव्हते. राज्यात महायुतीचे आमदार मोठ्या प्रमाणात असल्याने आमची ही जागा सहज निवडून येईल. त्यामुळे महाविकास आघाडी उमेदवार देणार नाही, असे मला वाटते.
