आता छातीत कळ नाही येत? जेलमधून बाहेर येण्यासाठी अगदी बिच्चारे बनायचे
मुंबई-मनोज जरांगेंना विरोध करण्यासाठी छगन भुजबळ यांना देवेंद्र फडणवीसांनी उभे केले असावे, असा गंभीर आरोप सामाजिक कार्यकर्त्या अंजली दमानिया यांनी केला आहे. अंजली दामनिया आज मंत्री छगन भुजबळ यांच्या घराबाहेर पत्रकार परिषद घेणार होत्या. त्यासाठी दमानिया भुजबळांच्या घराकडेही निघाल्या होत्या. मात्र पोलिसांनी अंजली दमानिया यांना रोखले. तरीही अंजली दमानिया भुजबळांच्या घराबाहेर पत्रकार परिषद घेण्यावर ठाम होत्या. त्यामुळे पत्रकार परिषद घेण्या अगोदरच पोलिसांनी त्यांना ताब्यात घेतले नंतर पोलिसांनी जुहू पोलीस ठाण्यात आणले आहे.
अंबड येथे ओबीसींच्या मेळाव्यात छगन भुजबळांनी मनोज जरांगेंवर घणाघाती टीका केली होती. त्यावर अंजली दमानिया यांनी प्रतिक्रिया दिली होती की, भुजबळांचे भाषण ऐकून तळ पायाची आग मस्तकात गेली. कुणाच्या कष्टाचे खात आहेत भुजबळ ? ह्याचा एक छोटा खुलासा करू असे सांगत त्यांच्या सांताक्रुझच्या निवास स्थानांबाहेर आज सकाळी ११.३० वाजता. मीडियाला येण्याची विनंती त्यांनी केली होतीतसेच, अंजली दमानिया यांनी राज्याचे उपमुख्यमंत्री देवेंद्र फडणवीस यांच्या भूमिकेवरही प्रश्नचिन्ह उपस्थित केले आहे. कुठेतरी मला असे वाटते की, छगन भुजबळांना देवेंद्र फडणवीसांनी जरांगेंना विरोध करण्यासाठी उभं केले आहे. आता तावा तावाने भुजबळ कसे बोलतात पाहा. जेलमधून बाहेर येण्यासाठी अगदी गरीब बिचारे बनण्याचा आव आणायचा. आता छातीत कळ नाही येत?, असे म्हणत अंजली दमानियांनी भुजबळ व फडणवीसांवर निशाणा साधला.
अशात आता अंजली दमानिया आज पत्रकार परिषद घेणार आहेत. छगन भुजबळ यांच्या कालच्या भाषणानंतर आज मी त्यांच्या घराचं समोर जाऊन पत्रकार परिषद घेणार आहे. मात्र त्यांच्या घराबाहेर पोलिसांनी बंदोबस्त वाढवला आहे. रस्त्यावर बॅरिकेड्स लावल्याचेही दिसत आहे. तरीही मी जाऊन पत्रकार परिषद घेईन, पोलिसांनी मला जिथे अडवले तिथे मी पत्रकार परिषद घेणार आहे. छगन भुजबळ यांच्याबाबत अनेक खुलासे मी करणार आहे, असे अंजली दमानिया म्हणाल्या होत्या. मात्र, त्यापूर्वीच पोलिसांनी त्यांना ताब्यात घेतले आहे. सुटका झाल्यानंतर अंजली दमानिया काय बोलणार, याकडे आता सर्वांचे लक्ष असेल.
मंत्री छगन भुजबळ यांच्या नाशिकच्या निवासस्थानी पोलिस बंदोबस्त वाढवण्यात आला आहे. ओबीसी मेळाव्यानंतर मंत्री छगन भुजबळ यांच्या विरोधात मराठा समाज आक्रमक झाला आहे. त्यामुळे कुठलाही अनुचित प्रकार घडू नये, म्हणून पोलीस खबरदारी घेत आहेत. भुजबळ यांच्या निवासस्थानाबाहेर पोलिस गस्त घालत आहेत. त्याचप्रमाणे ताफ्यातील पोलीस वाहनांच्या संख्येतही वाढ करण्यात आली आहे.
