एकीकडे पुण्यातून उमेदवारी देतांना जरा जपून: इशारा
दुसरीकडे फडणवीसांसह महाराष्ट्रातील सहा ‘दादा’ नेत्यांना शाहांचं दिल्लीत बोलावणे
पुणे:एकीकडे पुण्यातून उमेदवारी देतांना जरा जपून, सारे काही कोथरूडमध्येच देऊ नका, महापालिका पदाधिकारी राहिलेल्यांना उमेदवारी दिली तर कसबा विधानसभा निवडणुकीच्या निकालाच्या पुनरावृत्ती चा धोका लक्षात घ्या असा पुण्यातून इशारा देणारी सोशल मीडियातून जोरदार चर्चा उसळली असताना दुसरीकडे केंद्रीय गृहमंत्री अमित शाह यांच्या महाराष्ट्र दौऱ्यानंतर दिल्लीत तातडीने हालचाली सुरू झाल्या आहेत. लोकसभा उमेदवारांच्या निश्चितीसाठी आज बुधवारी सायंकाळी स्क्रिनिंग कमिटीची बैठक आयोजित करण्यात आली आहे. या बैठकीसाठी उपमुख्यमंत्री देवेंद्र फडणवीस, उच्च व तंत्र शिक्षण मंत्री चंद्रकांत पाटील, प्रदेशाध्यक्ष चंद्रशेखर बावनकुळे आणि माजी मंत्री आमदार आशिष शेलार, प्रविण दरेकर तसेच केंद्रीय मंत्री रावसाहेब दानवे आज सायंकाळपर्यंत दिल्लीत दाखल होणार असल्याचे समजते. या बैठकीत भाजपकडून राज्यातील उमेदवारांवर शिक्कामोर्तब केले जाणार असल्याचा दावा उच्चपदस्थ सूत्रांनी केला आहे.
शाह यांनी मुख्यमंत्री एकनाथ शिंदे, उपमुख्यमंत्री फडणवीस आणि अजित पवार यांच्याशी जागावाटपाबद्दल चर्चा केल्याचे समजते. त्यानंतर लगेचच दिल्लीत महाराष्ट्रातील उमेदवारांची नावे निश्चित करण्याच्या प्रक्रियेला वेग आला आहे. भाजपचे राष्ट्रीय अध्यक्ष जे. पी. नड्डा यांनी स्क्रिनिंग कमिटीची बैठक आयोजित केली असून या बैठकीसाठी फडणवीस, पाटील, बावनकुळे, शेलार, दरेकर हे उपस्थित राहणार असल्याचे समजते.
