आंतरराष्ट्रीय पातळीवर भारतातील महिला सुरक्षेबाबत चिंता
हंसदिहा पोलीस ठाण्याच्या हद्दीतील कुरमहाट परिसरात शुक्रवारी रात्री उशिरा स्पॅनिश महिलेवर सामूहिक बलात्कार झाल्याची घटना समोर आली आहे. स्पॅनिश महिला टुरिस्ट व्हिसावर भारतात आली होती.फिरताना रात्र झाली तेव्हा ही महिला कुरमाहाट परिसरातील एका शेतात तंबूत आराम करत होती. यावेळी हा प्रकार घडला. विरोध केला असता तिला मारहाणही करण्यात आली.
हंसदिहा पोलीस स्टेशन हद्दीतील कुंजी गावातील 7-8 तरुण या सामूहिक बलात्कारात सामील असल्याचे सांगण्यात येत आहे. या प्रकरणी पोलिसांनी चार जणांना ताब्यात घेऊन चौकशी सुरू केली आहे.
घटनेची माहिती मिळताच एसपी पितांबर सिंह खैरवार रात्री उशिरापासून हंसदिहा पोलीस ठाण्यात तळ ठोकून प्रकरणाच्या तपासात गुंतले होते. जिल्हा मुख्यालयातून श्वानपथकाची टीमही मागवण्यात आली आहे. पोलिस ठाण्यात दाखल केलेल्या तक्रारीनुसार, पीडित परदेशी महिलेचे वय सुमारे 30 वर्षे आहे.पती-पत्नी स्पेनमधून टुरिस्ट व्हिसावर भारतात आले आहेत. ते प्रथम पाकिस्तानात गेले होते, तेथून बांगलादेशमार्गे झारखंडमधील दुमका येथे पोहोचले होते. महिला आपल्या पतीसोबत बाईक टूरवर आली होती. ते दुमकामार्गे भागलपूरकडे जात होते. पण जेव्हा रात्र झाली तेव्हा त्यांनी तंबू ठोकला आणि हंसदिहा बाजारासमोर निर्जन ठिकाणी झोपले. दरम्यान, शेजारील काही तरुण तेथे पोहोचले आणि त्यांनी महिलेवर सामूहिक बलात्कार केला आणि त्यानंतर तिला मारहाणही केली.रात्री 10.30 च्या सुमारास कुरमाहाट चौकात पोलीस पथक पाहून महिलेने गस्तीवर असलेल्या पथकाला आपल्यासोबत घडलेल्या घटनेची माहिती दिली. पीडित महिला आणि तिच्या पतीला हिंदी येत नसल्याने त्यांनी आपल्या मोबाईलवरून गुगल ट्रान्सलेटच्या मदतीने पोलिसांना घटनेची माहिती दिली.
पोलिसांनी शोधमोहीम सुरू केली तेव्हा शेतात महिलेची अंतर्वस्त्रे सापडली. जी पोलिसांनी जप्त केली आहे. पोलिसांनी महिलेला रात्री उशिरा सरैयाहाट सामुदायिक आरोग्य केंद्रात नेले. जिथे तपासात महिलेवर सामूहिक बलात्कार झाल्याची पुष्टी झाली.
