आमदार रोहित पवार यांनी योगेश कदम आमचा कार्यकर्ता असल्याचे ठणकावून सांगितले. पोलिसांनी त्याला पोलिस स्टेशनला आणले होते. त्याचा जबाब घेतला. आता त्याला कोर्टात हजर करणार आहेत. मी स्वतः त्याला भेटण्यासाठी जात आहे. सत्ताधाऱ्यांनी उगीच अॅक्टिंग करू नये. जाहीरपणे सांगतोय, तो आमचा कार्यकर्ता आहे, असे रोहित पवार म्हणाले.
मुंबई- मराठा आंदोलकांची प्रतिक्रिया घेणारा एक व्हिडिओ तथाकथित गावरान विश्लेषक नामक एका यूट्यूब चॅनलवर प्रकाशित झाला. यामध्ये एका अज्ञात व्यक्तीने ब्राह्मण समाजाला संपवण्याचे वक्तव्य केले. तसेच उपमुख्यमंत्री देवेंद्र फडणवीस यांच्याविषयी एकेरी वक्तव्य करत त्यांच्यावर टीका केली. योगेश सावंतने हा व्हिडिओ आपल्या ट्विटर हँडलवर शेअर केला. पण पोलिसांनी हा व्हिडिओ टाकणाऱ्या चॅनेलवर कारवाई करण्यापूर्वीच योगेश सावंतला अटक केली. आता त्याच्या अटकेचे विधानसभेच्या अर्थसंकल्पीय अधिवेशनात तीव्र पडसाद उमटत आहेत.
भाजप आमदार राम कदम यांनी विधानसभेत योगेश सावंतवर फडणवीस यांना जिवे मारण्याची धमकी दिल्याचा आरोप केला. एका व्हायरल क्लिपमध्ये राज्यात जातीवाद पसरवण्याचे षडयंत्र दिसून येत आहे. या व्हिडिओ देवेंद्र फडणवीस यांना महाराष्ट्राच्या मातीत गाडण्याची व त्यांच्यासारख्या ब्राह्मणांना अवघ्या 3 मिनिटांत संपवण्याची भाषा करण्यात आली आहे. योगेश कदमचे संबंध बारामतीशी आहेत. आमदार रोहित कदम यांनी या कदमला सोडण्यासाठी पोलिसांना फोन केला. या दोघांचा काय संबंध आहे? असा सवाल राम कदम यांनी या प्रकरणी उपस्थित केला.
देवेंद्र फडणवीस यांच्याविरोधात अवमानास्पद पोस्ट शेअर केल्याप्रकरणी मुंबई पोलिसांनी योगेश सावंत नामक तरुणाला अटक केली आहे. योगेश सावंत असे या तरुणाचे नाव आहे. तो राष्ट्रवादी काँग्रेसच्या शरद पवार गटाच्या सोशल मीडिया सेलचा कार्यकर्ता आहे. त्यांच्या अटकेवरून गुरुवारी विधानसभेत सत्ताधारी व विरोधी पक्षांच्या आमदारांत तीव्र शाब्दिक चकमक उडाली.
योगेश सावंतवर देवेंद्र फडणवीस यांच्याविरोधात अवमानास्पद भाषा वापरून त्यांना जीवे मारण्याच्या धमकीची पोस्ट शेअर केल्याचा आरोप आहे. मुंबई पोलिसांनी बुधवारी रात्री त्याला अटक केली. त्याच्यावर भादंवि कलम 153(अ), 500, 505(3), 506(2) व 34 अंतर्गत गुन्हा दाखल करण्यात आला आहे.
दुसरीकडे, महाविकास आघाडीनेही मुंबई पोलिसांच्या या कारवाईचा निषेध केला आहे. एका ट्यूब चॅनलने व्हिडिओद्वारे मराठा आंदोलक तरुणाची घेतलेली प्रतिक्रिया राष्ट्रवादी काँग्रेस पार्टी शरदचंद्र पवार सोशल मीडियाचे योगेश सावंत यांनी सोशल मिडियावर शेअर केली, जे कुठल्याही प्रकारचे गुन्हेगारी कृत्य ठरत नाही. योगेशला अटक करून सरकारने चालवलेल्या मुस्कटदाबीचा आम्ही निषेध करतो. योगेश, आम्ही सर्व तुझ्यासोबत आहोत, असे महाविकास आघाडीने आपल्या ट्विटमध्ये म्हटले आहे.
