राज्याचे अन्न व नागरी पुरवठा मंत्री छगन भुजबळ राज्याचे सामाजिक आरोग्य बिघडवण्याचे काम करत असल्याचा आरोप संभाजीराजे छत्रपती यांनी शुक्रवारी केला. त्यांनी या प्रकरणी भुजबळांची राज्य मंत्रिमंडळातून हकालपट्टी करण्याची मागणीही केली आहे.छगन भुजबळ यांच्या नेतृत्वात शुक्रवारी जालन्याच्या अंबड येथे ओबीसी आरक्षण बचाव एल्गार सभा झाली. या सभेत भुजबळ यांनी मराठा आरक्षणाचा चेहरा ठरलेल्या मनोज जरांगे पाटील यांच्यावर तिखट हल्ला चढवला. या पार्श्वभूमीवर संभाजीराजे छत्रपती यांनी एका ट्विटद्वारे भुजबळांवर राज्याचे सामाजिक आरोग्य बिघडवण्याचा आरोप केला आहे.
छगन भुजबळ हे राज्याचे सामाजिक स्वास्थ्य बिघडवण्याचे काम करत आहेत. सर्वसामान्य ओबीसी बांधवांचा मराठा समाजास कोणताही विरोध नसताना केवळ आपले राजकीय स्थान टिकवण्यासाठी दोन समाजांत नसलेली भांडणं लावण्याचं पाप करत आहेत.सरकारमधील एक मंत्री उघडपणे वेगळी भूमिका घेऊन जातीय तेढ निर्माण करत असतील तर सरकारची देखील हीच भूमिका आहे का? हे स्पष्ट करावे, अन्यथा छगन भुजबळ यांची मंत्री पदावरून हकालपट्टी करावी, अशी मागणी संभाजीराजे छत्रपती यांनी आपल्या ट्विटद्वारे केली आहे.
छगन भुजबळ सभेत मनोज जरांगेवर हल्ला करताना म्हणाले की, आता मराठा समाजाचे नवे देव झालेत. दगडाला शेंदूर फासून देव कुठे झाला? आमची लेकरं बाळ आमची लेकरंबाळ ही दोनचं वाक्य येतात का? आम्हाला लेकंर बाळं नाहीत का? आजवर मराठा नेत्यांनी सर्वांना सोबत घेऊन जाण्याची भूमिका घेतली. अरे मराठा तरुणांनो, याच्या मागे कुठे लागलात? केंद्राने ओबासी आरक्षणाचा आदेश दिला. त्यानंतर तो शरद पवार यांनी मान्य केला. मराठा समाज अवैधपणे ओबीसी आरक्षणात शिरतोय. आरक्षण म्हणजे काय हे तर आधी समजून घ्या. आमचा मराठा आरक्षणाला विरोध नाही. आरक्षण म्हणजे गरिबी हटाव कार्यक्रम नाही.
