मुंबई-
काँग्रेसने महाराष्ट्रातून राज्यसभेची उमेदवारी चंद्रकांत हंडोरे यांना दिली आहे.चंद्रकांत हंडोरे हे महाराष्ट्रातील दलित समाजातील नेते म्हणून ओळखले जातात. गेल्या विधान परिषद निवडणुकीत देखील काँग्रेसने हंडोरे यांना उमेदवारी दिली होती. मात्र, त्या वेळी झालेल्या क्रॉस मतदानामुळे हंडोरे यांचा पराभव झाला होता. या वेळी हंडोरे यांना पुन्हा संधी देण्यात आली आहे. महाराष्ट्रातून राज्यसभेसाठी सहा उमेदवारांची निवड करण्यात येणार आहे. या वेळी विधिमंडळातील संख्याबळ पाहाता भाजपचे 3, एकनाथ शिंदे यांचा 1, अजित पवार यांचा 1 उमेदवार निवडून येईल. तर एका जागेवर काँग्रेसचा उमेदवार विजयी होण्याची शक्यता आहे. मात्र, भाजप चौथा उमेदवार देण्याची शक्यता असल्याने या वेळी देखील आमदारांच्या गुप्त मतदानामध्ये गडबड होण्याची शक्यता वर्तवण्यात येत आहे.
चंद्रकांत दामोदर हंडोरे हे महाराष्ट्र काँग्रेसचे सदस्य आहेत. हंडोरे यांनी विलासराव देशमुख यांच्या कार्यकाळात महाराष्ट्र विधानसभेत चेंबूरचे प्रतिनिधित्व देखील केले आहे. 5 फेब्रुवारी 2021 रोजी हंडोरे यांची महाराष्ट्र प्रदेश काँग्रेस कमिटीचे कार्याध्यक्ष म्हणून नियुक्ती करण्यात आली होती. महाराष्ट्र सरकारच्या सामाजिक न्याय विभागाचे कॅबिनेट मंत्री म्हणून देखील काम पाहिले आहे. 1992 ते 1993 या कालावधीत त्यांची मुंबईच्या महापौरपदी निवड झाली होती. हंडोरे हे 2014 ते 2021 या कालावधीत महाराष्ट्र प्रदेश काँग्रेस कमिटीचे उपाध्यक्ष होते. 2020 पासून ते मुंबई प्रदेश काँग्रेस कमिटीचे प्रभारीही आहेत. हंडोरे हे “भीम शक्ती” या आंबेडकरवादी आणि सामाजिक-राजकीय संघटनेचे संस्थापक आणि अध्यक्ष म्हणून ओळखले जातात. या संघटनेची महाराष्ट्रात सर्वदूर कार्यकर्ते आहेत.
