पुणे-पुणे जिल्हा परिषद निवडणुकीत बोगस मतदान केल्याप्रकरणी सहा जणांविरुद्ध गुन्हा दाखल करण्यात आला आहे. नगर रस्त्यावरील केसनंद भागातील एका मतदान केंद्रावर ही घटना घडली असून, त्यांच्याकडून बनावट आधारकार्ड जप्त करण्यात आले आहेत.
या प्रकरणी मोहम्मद एहसान नजर (वय २०), अर्षद रोशन अली (वय २२), अखिलेश बिजूकुमार प्रसाद (वय २०), दिलीप सक्रु चव्हाण (वय ३६), प्रेमदास रामचंद्र राठोड (वय ३०) आणि अश्विनी प्रेमदास राठोड (वय २७) यांच्याविरुद्ध गुन्हा नोंदवण्यात आला आहे. पोलीस हवालदार बाळासाहेब हराळ यांनी वाघोली पोलीस ठाण्यात याबाबत फिर्याद दिली आहे.
पोलिसांनी दिलेल्या माहितीनुसार, जिल्हा परिषदेचे मतदान शनिवारी (७ फेब्रुवारी) पार पडले. केसनंद भागातील श्री जोगेश्वरी विद्यालयाच्या आवारातील मतदान केंद्रात तीन आरोपींनी मतदान केले. त्यानंतर, मतदान केंद्रातील कर्मचाऱ्यांनी इतर तीन जणांची चौकशी केली असता, त्यांच्याकडे बनावट आधारकार्ड आढळून आले. पोलिसांनी तात्काळ सहाही जणांना ताब्यात घेतले.
गुन्हा दाखल करण्यात आलेले आरोपी बांधकाम मजूर असून, ते सध्या केसनंद भागातील एका नियोजित गृहप्रकल्पाच्या आवारात राहतात. यातील तीन आरोपी मूळचे उत्तर प्रदेशातील आहेत, तर उर्वरित तीन वाशीम जिल्ह्यातील आहेत. गुन्हे शाखेच्या पोलीस निरीक्षक पल्लवी मेहेर या प्रकरणाचा पुढील तपास करत आहेत.
