महावितरणकडून वीज ग्राहकांना सहकार्याचे आवाहन
पुणे, दि. २ फेब्रुवारी,२०२६ : महापारेषण कंपनीच्या २२० के.व्ही. भोसरी अतिउच्चदाब उपकेंद्रातील ८० एमव्हीए (MVA) क्षमतेच्या अतिउच्चदाब रोहित्रामध्ये सोमवारी (दि.२) दुपारी तीन वाजेच्या सुमारास अंतर्गत बिघाड झाला आहे. महापारेषण व महावितरण कंपनीच्या कर्मचाऱ्यांनी त्याच्या दुरुस्तीसाठी अथक परिश्रम घेतले मात्र ते दुरुस्त होऊ शकले नाही. परिणामी या अतिउच्चदाब रोहित्रावर अवलंबून असलेला ८० एमव्हीएचा वीजभार बाधित झाला असून भोसरी व पिंपरी विभागातील वीज ग्राहकांवर त्याचा परिणाम होणार आहे.
खालील परिसरातील वीजपुरवठा बाधित राहणार
• भोसरी गावठाण
• टी ब्लॉक
• जनरल ब्लॉक
• एस ब्लॉक
• शांतीनगर
• धावडे वस्ती
• गुळवे वस्ती
• आळंदी रोड परिसर
• चक्रपाणी वसाहत
पर्यायी व्यवस्थेसाठी युद्धपातळीवर प्रयत्न
महावितरणच्या भोसरी व पिंपरी विभागामार्फत पर्यायी व्यवस्थेच्या माध्यमातून वीजपुरवठा सुरळीत करण्यासाठी युद्धपातळीवर प्रयत्न सुरू आहेत. त्यासाठी मोठ्या प्रमाणावर दुसऱ्या वीज वाहिनीवर भार टाकावा लागणार असल्यामुळे वीजपुरवठा सुरळीत करताना त्यात अडचणी येऊ शकतात. त्यावर मात करण्यासाठी महावितरणतर्फे त्वरीत उपाययोजना करण्यात येणारच आहेत.
वीज ग्राहकांना सहकार्याचे आवाहन
अचानक उद्भवलेल्या या वीज संकटावर मात करण्यासाठी महावितरणचे प्रयत्न युद्धपातळीवर सुरू आहेत. अशावेळी वीज ग्राहकांनीही महावितरणला सहकार्य करावे, विजेचा वापर काटकसरीने करावा असे आवाहन महावितरण प्रशासनातर्फे करण्यात आले आहे.
