माजी मंत्र्यांच्या मुलाला पाडलं, पुण्यात प्रशांत जगतापांचा भाजपला धक्का, काँग्रेसचं खातं उघडलं

पुणे : पुणे महापालिकेच्या निवडणुकीत सर्वांचं लक्ष लागून असलेल्या वानवडी-साळुंके विहार प्रभाग क्रमांक १८ ड चा निकाल समोर आला आहे. या प्रभागामधून प्रशांत जगताप यांनी दणदणीत विजय मिळवला आहे. निवडणुकीच्या तोंडावर काँग्रेसमध्ये प्रवेश केलेल्या जगताप यांनीी भाजपच्या अभिजित शिवरकर यांचा पराभव केला आहे. मतमोजणीच्या सुरुवातीला पिछाडीवर असलेल्या जगतापांनी शिवरकर यांचे लीड मोडून काढत आघाडी घेतली होती. त्यानंतर त्यांनी ही आघाडी कायम ठेवत आपला विजय साकार केला आहे.प्रशांत जगताप हे गेल्या अनेक वर्षांपासून राष्ट्रवादीसोबत एकनिष्ठ राहिले होते. मात्र जेव्हा दोन्ही राष्ट्रवादी एकत्र लढवण्याचा निर्णय घेतल्यावर त्यांनी आपल्या पक्षाला रामराम केला होता. राष्ट्रवादीमध्ये दोन गट झाल्यावर जगताप यांनी शरद पवारांची साथ सोडली नव्हती. पण जेव्हा दोन्ही राष्ट्रवादींनी एकत्र येण्याचं ठरवलं त्यानंतर त्यांनी पदाचा राजीनामा दिला होता. राष्ट्रवादी सोडल्यावर त्यांनी काँग्रेसमध्ये प्रवेश केला होता. त्यामुळे ही निवडणूक त्यांच्यासाठी प्रतिष्ठेची झाली होती. जगताप यांच्या विजयाने काँग्रेसने पुण्यात आपलं खातं उघडलं आहे.प्रशांत जगताप यांनी माजी राज्यमंत्री बाळासाहेब शिवरकर यांचा मुलगा अभिजीत शिवरकर यांचा पराभव केला. प्रशांत जगताप यांनी अटीतटीच्या लढतीत लीड खेचून आणत १५३४ मतांनी जगताप यांनी विजय मिळवला आहे. कार्यकर्त्यांमध्ये उत्साहाचे वातावरण असून, समर्थकांनी फटाक्यांची आतषबाजी करत आनंद साजरा केला. दरम्यान, पुण्यात आता समोर आलेल्या कलांनुसार भाजप एकहाती सत्ता मिळवण्याच्या दिशेने वाटचाल करताना दिसत आहे. भाजपने ५० पेक्षा जास्त जागांवर आघाडी घेतली असून राष्ट्रवादी- ५ आणि काँग्रेस- ३ आहे.