पुणे-भाजपला लोकनेते आवडत नाही. भाजपने अनेक लोकांची ताकद कमी केली. भाजपने त्यांच्याच पक्षातील नेत्यांची ताकदही कमी केल्याचे रोहित पवार म्हणालेत. आगामी निवडणुकीत अजित पवार आणि एकनाथ शिंदे यांना भाजपच्या चिन्हावर लढावे लागेल हे लिहून ठेवा, असेही रोहित पवार म्हणाले.आमदार रोहित पवारांनी अॅग्रीकल्चर डेव्हलपमेंट ट्रस्टच्या वतीने बारामतीच्या कृषी विज्ञान केंद्रात कृषी प्रदर्शनाची पाहणी केली. 18 ते 22 दरम्यान कृषी विज्ञान केंद्रात कृषी प्रदर्शन होणार आहे.
अजित पवारांची ताकद कमी करण्याचा प्रयत्न-अजित पवारांचा व्हिडीओ पाहून वाईट वाटलं. अजित पवारांकडे रुबाब आहे, पण तो रुबाब त्यांनी सोडू नये. भाजपत त्यांची ताकद कमी करायचा प्रयत्न करत आहे, असे व्हिडीओ बघून वाटत असल्याचे रोहित पवार म्हणाले.
राष्ट्रवादी पक्षाचा निर्णय आमच्या बाजूने लागणार-राष्ट्रवादी काँग्रेसचा आश्चर्यकारक निकाल लागेल. लोकांच्या मनात आहे तो निकाल लागेल. ज्याअर्थी भाजप नेते म्हणतात, अजित पवार यांच्या बाजूने निकाल लागेल, लिहून ठेवा त्याअर्थी तसा निकाल लागणार नाही, असा विश्वास रोहित पवारांनी व्यक्त केला.
दावोस दौऱ्यावरून रोहित पवारांचा सवाल-दावोसला ज्या कंपनीत काल करार केले, त्या सगळ्या कंपन्याचे ऑफिस मुंबईत आहेत. मग इथे करार का केला नाही? दावोसला का जावे लागले? असा सवाल रोहित पवार यांनी उपस्थित केला. अदाणी यांना मुख्यमंत्री दावोसमध्ये भेटले, तिकडे भेटायचे कारण काय होत? गुजरातला 26 हजार कोटींची तरतूद येते, महाराष्ट्रामध्ये का येत नाही? असा सवालही त्यांनी उपस्थित केला.महाराष्ट्रावर वरून दबाव होता. जर महाराष्ट्रामध्ये उद्योग आले, तर तिकडे काही राहणार नाहीत. मागच्या वर्षी एका कंपनीसोबत 3 कोटींचा करार केला. उगाच करार दाखवले की, 20 हजार कोटीचे करार करायचे म्हणून करू नका, असे रोहित पवार म्हणाले.
मराठी माणसे घाबरत नाही
केंद्रीय तपास यंत्रणा काम करीत असतात. धाड टाकली म्हणून आम्ही शांत बसलो नाही. मराठी माणसे घाबरत नाहीत. आम्ही आधी व्यवसायात आलो, मग राजकारणात आलो. आम्ही चोरीचा पैसा राजकारणात वापरत नाही, तुम्ही व्यवसाय करून चोरीचा पैसा राजकारणात वापरतात, असा हल्लाबोल रोहित पवारांनी केला.
भाजपकडे दमदार नेतृत्व नाही
रोहित पवार म्हणाले- भाजपकडे दमदार नेतृत्व असलेले नेते शिल्लक राहिलेले नाहीत. म्हणूनच भाजप शिंदे आणि अजित पवार गटातील लोकांना पक्षात घेऊन मंत्रिपद देत आहे. भाजपचे खायचे आणि दाखवायचे दात वेगळे आहेत.
