पुणे-पुणे शहरात कोंढवा परिसरात अफू बाळगणाऱ्या राजस्थानातील एका आरोपीला गुन्हे शाखेच्या अमली पदार्थ विरोधी पथकाने अटक केली आहे. त्याच्या ताब्यातून १४ लाख ९८ हजारांची अफू जप्त करण्यात आली. बिबवेवाडी भागात अमली पदार्थ विरोधी विभागाने कारवाई करुन एकाकडून ११ लाखांचे मेफेड्रोन जप्त केले.
कोंढवा परिसरात अमली पदार्थ विरोधी पथक गस्त घालत होते. त्यावेळी भैरवनाथ मंदिराजवळ एक जण थांबलेला असून, त्याच्याकडे अफू असल्याची माहिती अमली पदार्थ विरोधी पथकातील पोलीस कर्मचारी सचिन माळवे यांना मिळाली होती. त्यानंतर सापळा लावून पोलिसंनी भागीरथराम रामलाल बिष्णोई (वय ४६, रा. टिळेकरनगर, कोंढवा) याला पकडले आहे. त्याच्याकडून १४ लाख ९८ हजार रुपयांची अफू, पिशवी, इलेक्ट्राॅनिक वजनकाटा असा १५ लाख चार हजार २०० रुपयांचा मुद्देमाल हस्तगत केला. बिष्णोई याच्याविरुद्ध कोंढवा पोलीस ठाण्यात अमली पदार्थ विरोधी प्रतिबंधक कायद्यान्वये गुन्हा दाखल करुन त्याला अटक करण्यात आली.
बिबवेवाडी भागात अमली पदार्थ विरोधी पथकाने दुसऱ्या एका कारवाई मध्ये पोलिसांनी एकाकडून ११ लाखांचे मेफेड्रोन जप्त केले. विठ्ठल ऊर्फ अण्णा रघुनाथ कराडे (वय ५७, रा. बिबवेवाडी ,पुणे) याच्याकडे मेफेड्रोन असल्याची माहिती आझीम शेख यांना मिळाली़ पोलिसांनी सापळा लावून त्याला पकडले. ११ लाख २ हजार रुपयांचे मेफेड्रोन, इलेक्ट्राॅनिक वजनकाटा, मोबोइल संच असा ११ लाख २४ हजार रुपयांचा मुद्देमाल जप्त करण्यात आला. गुन्हे शाखेचे अतिरिक्त पोलीस आयुक्त पंकज देशमुख, पोलीस उपायुक्त विवेक मासाळ, सहायक आयुक्त गणेश इंगळे, राजेंद्र मुळीक यांच्या मार्गदर्शनाखाली पोलीस
निरीक्षक सुदर्शन गायकवाड, प्रशांत अन्नछत्रे, सहायक निरीक्षक नितीनकुमार नाईक, पोलीस कर्मचारी योगेश मांढरे, चेतन गायकवाड, संदीप शेळके, नितीन जगदाळे, युवराज कांबळे, दिनेश बास्टेबाड यांनी ही कामगिरी केली.
