पिंपरी चिचंवड येथील शंभरावा अखिल भारतीय नाट्यसंमेलनाचा कार्यक्रम आटोपून मनसे अध्यक्ष राज ठाकरे मुंबईच्या दिशेने जात असताना अचानक खालापूर टोलनाक्याजवळ उतरले. यावेळी वाहतूक कोंडीत अडकलेल्या अँम्बुलन्सला त्यांनी रस्ता मोकळा करुन दिला. तसेच टोलनाक्यावर उपस्थित असलेल्या अधिकाऱ्यांना ठाकरे शैलीत दम दिल्याचे दिसून आले. राज ठाकरे यांचा टोलनाक्यावरील व्हिडिओ सध्या सोशल मीडियावर समोर आला आहे.
नेमके प्रकरण काय?
पिंपरी चिचंवड येथील शंभरावा अखिल भारतीय नाट्यसंमेलनाचा कार्यक्रम आटोपून मनसे अध्यक्ष राज ठाकरे मुंबईच्या दिशेने निघाले होते. यावेळी खालापूर टोलनाक्यावर हजारोंच्या संख्येने पाच किलोमीटरच्या रांगेत वाहने ट्रॅफीकमध्ये अडकली होती. यामध्ये एक रुग्णवाहिकाही अडकली होती. त्यामुळे लोकांची होत असलेली गैरसोय बघून स्वतः राज ठाकरे अचानक टोलनाक्यावर गेले आणि त्यांनी अडकलेल्या अँम्बुलन्सला रस्ता मोकळा करुन दिला. याशिवाय तासंतास खोळंबलेली वाहतूक त्यांनी क्षणात मोकळी केली. तसेच टोलनाक्यावर उपस्थित असलेल्या अधिकाऱ्यांचाही राज ठाकरे यांनी चांगलाच समाचार घेतला.
राज ठाकरे यांची अधिकाऱ्यांना तंबी
यावेळी अधिकाऱ्यांना दम देताना “यापुढे मला असला प्रकार दिसला तर याद राखा,” असे म्हणत राज ठाकरे यांनी टोलनाक्यावरील अधिकाऱ्याला बजावले. दरम्यान, त्यांनी पुढाकार घेऊन टोलनाक्यावरील वाहने सोडल्याने वाहतूक कोंडीत अडकलेल्या वाहनचालकांना मोठा दिलासा मिळाला.
टोलविरोधात राज्यभर आंदोलन
मनसेने याआधी देखील टोलविरोधात राज्यभर आंदोलन केली होती. अशातच आता ट्रॅफिक जाम पाहिल्यानंतर राज ठाकरे यांनी स्वत: हातात घेतली आणि गाड्या सोडून दिल्या. राज ठाकरे स्वत: उतरल्याचे पाहताच कॉन्ट्रॅक्टरची तारंबळ उडाली होती. मनसेचे पदाधिकारी देखील त्यावेळी उपस्थित होते. तब्बल 5 किलोमीटर झालेल्या वाहतुक कोंडीमुळे राज ठाकरे संतापल्याचे पहायला मिळाले.
