पुणे-भाजपचे आमदार आणि मंत्री चंद्रकांत पाटील यांनी सांगलीचे अपक्ष खासदार विशाल पाटील यांना भाजपसोबत येण्याची जाहीर ऑफर दिली आहे. विशाल पाटील आमच्यासोबत आल्यास केंद्रातील आमची संख्या वाढेल आणि सांगलीच्या विकासालाही गती मिळेल, असे चंद्रकांत पाटील म्हणाले. तर मला भाजप प्रवेशाची ऑफर येत असेल तर मी चांगले काम करतोय असे मी समजतो, अशी प्रतिक्रिया विशाल पाटील यांनी दिली. तसेच भाजप प्रवेशाबाबत माझा कोणताही विचार नसल्याचे ते म्हणाले.राज्यातील लोकसभा आणि विधानसभा निवडणुका संपल्यानंतरही राजकीय पक्षांमध्ये नेत्यांच्या पक्ष बदलण्याचा सिलसिला सुरूच आहे. काही दिवसांपूर्वी काँग्रेसचे नेते आणि पुण्यातील माजी आमदार रवींद्र धंगेकर यांनी काँग्रेसला सोडचिठ्ठी देत शिवसेना शिंदे गटात प्रवेश करत शिवधनुष्य हाती घेतले. त्यानंतर आता भाजपचे नेते आणि मंत्री चंद्रकांत पाटील यांनी काँग्रेसमधून बंडखोरी करणारे सांगलीचे अपक्ष खासदार विशाल पाटील यांना भाजपमध्ये सामील होण्याची खुली ऑफर दिली आहे.
राजकारणात नेहमी वर्तमानावर चालावे लागते पुढे काय होईल माहित नाही, वर्तमान काळात त्यांच्या हाताशी अजूनही चार वर्ष दोन महिने आहेत. या कालावधीचा आम्ही विचार करतो, असे चंद्रकांत पाटील म्हणालेत. जर ते बरोबर आले तर आमची केंद्रातली संख्या देखील वाढते, सोबतच सांगली जिल्ह्यातील विकासाच्या कामाला त्यांना जे काय करायचे आहे. त्याला देखील सोपे जाईल, म्हणून आम्ही त्यांना जाहीर ऑफर पुन्हा एकदा देत आहोत, त्याचा त्यांनी विचार करावा, असेही चंद्रकांत पाटील यांनी म्हटले.
विशाल पाटलांची प्रतिक्रिया
चंद्रकांत पाटील यांनी भाजपसोबत येण्याच्या ऑफरवर खासदार विशाल पाटील यांनीही प्रतिक्रिया दिली. मी ज्या पद्धतीने संसदेत प्रश्न मांडतोय, ही चंद्रकांत दादांना माझ्या कामाची पद्धत आवडली असेल. मला सतत भाजप प्रवेशाची ऑफर येत असेल तर मी चांगलं काम करतोय असे मी समजतो, असे विशाल पाटील म्हणाले. पण भाजप प्रवेशाबाबत मी कोणताही विचार करत नाही. मी आता कायद्यानेच दुसऱ्या कोणत्याही पक्षात जाऊ शकत नाही. सर्व लोकप्रतिनिधींनी पक्ष गट तट बाजूला ठेवून सांगली जिल्ह्याच्या विकासासाठी विचार करतोय हे माझे धोरण आहे, असे विशाल पाटील यांनी सांगितले.
पश्चिम महाराष्ट्रातील सांगली लोकसभा मतदारसंघात विशाल पाटील यांनी अपक्ष म्हणून निवडणूक लढवून विजय मिळवला आहे. या मतदारसंघातून उद्धव ठाकरे गटाने चंद्रहार पाटील यांना आधीच उमेदवारी दिली होती. काँग्रेसचे विशाल पाटील यांची या मतदारसंघात दोन वर्षांपासून निवडणूक लढवण्यासाठी तयारी सुरू होती. पण ठाकरे गटाच्या उमेदवाराला तिकीट जाहीर झाल्याने विशाल पाटील बंडखोरी करत लोकसभेच्या रिंगणात उतरले आणि त्यांनी भाजपचे संजय काका पाटील यांचा पराभव करत ठाकरे गटाला मोठा धक्का देत निवडणूक जिंकली. विशाल पाटील यांनी 5 लाख 71 हजार 666 मतांनी विजय मिळवला, तर त्यांचे प्रतिस्पर्धी भाजपचे संजय काका पाटील यांना 4 लाख 71 हजार 613 मते मिळाली. शिवसेना ठाकरे गटाचे उमेदवार चंद्रहार सुभाष पाटील तिसऱ्या क्रमांकावर राहिले आणि त्यांना फक्त 60 हजार 860 मते मिळाली होती.
