‘अजित पवारांचे 42 आमदार आणि शरद पवारांचे 10 आमदार हे कसे शक्य आहे?’
मुंबई-मनसे मेळाव्यात बोलताना राज ठाकरे यांनी विधानसभा निवडणुकीवर रोखठोक भाष्य केले आहे. विधानसभेचा निकाल लागल्यानंतर सगळीकडे सन्नाटा होता. शिवाय कुणालाही कळलं नाही असं कसं काय झालं?, ज्या अजित पवारांचा एक खासदार निवडून आला होता त्यांचे ४२ आमदार कसे निवडून आले? लोकसभेनंतर चार महिन्यात लोकांचे मत इतके कसे बदलले, तसेच बाळासाहेब थोरात ७ वेळा निवडून आले होते ते कसे काय पडले? असे सवाल उपस्थित करत राज ठाकरे यांनी रोखठोक भूमिका मांडली आहे.
राज ठाकरे म्हणाले, ” महाराष्ट्र विधानसभा निवडणुकीचे निकाल लागल्यानंतर माझ्याकडे संघाशी संबंधित एक गृहस्थ आले होते. मला त्यांनी एक वाक्य सांगितले. मला म्हणाले इतना सन्नाटा क्यूँ है भाई ? कोई तो जिता होगा. निकालानंतर महाराष्ट्रात जो सन्नाटा पसरला ते कसले द्योतक आहे? आमचे राजू पाटील आज इथे बसले आहेत. त्यांचे एक गाव आहे तिथे त्यांनाच मतदान होते. १४०० लोकांचे गाव आहे ते.
या गावात राजू पाटील यांना किती मते मिळाली असतील? एक पण नाही. कसे काय शक्य आहे? संपूर्ण गावातले एकही मत मिळाले नाही? मराठवाड्यातला आपला एक पदाधिकारी आहे तो नगरसेवक आहे. तो नगरसेवक असताना त्याला साडेपाच हजारांचे मतदान त्याच्या भागातून आहे. यावेळी विधानसभेला उभा असताना त्याला किती मतदान झाले? अडीच हजार मतं. अनेक असे निर्णय आहेत ज्यावर विश्वास बसतच नाही.”
ते पुढे म्हणाले, “निवडून आलेल्यांचा विश्वास नाही, पडलेल्यांचे काय घेऊन बसलोय आपण? निवडून आलेले रोज रात्री बायकोला सांगतात चिमटा काढ म्हणून. काँग्रेस नेते बाळासाहेब थोरात ७ वेळा आमदार झाले. ते ७ वेळा ७० ते ८० हजार मताधिक्यांनी निवडून यायचे त्यांचा १० हजार मतांनी पराभव झाला. कदाचित अनेक लोकं बोलतील राज ठाकरे पराभूत झाल्याने हे बोलत आहेत, मी नाही संपूर्ण महाराष्ट्र बोलतो आहे. जे निवडून आले आणि सत्तेत आहेत त्यांचे मला अनेकांचे फोन आले त्यांनाही शॉक बसला आहे.भाजपाला १३२ जागा मिळाल्या चला ठीक आहे. २०१४ ला त्यांना १२२ जागा मिळाल्या होत्या, नंतर १०५ आल्या, आता १३२ आल्या समजू शकतो. अजित पवारांचे ४२ आमदार निवडून आले? त्यांचे ४-५ आमदार तरी येतील का? असे सगळ्यांना वाटत होते. कुणाचा तरी विश्वास बसेल का? जे इतके दिवस राज्यात राजकारण करत आले आहेत, ज्यांच्या जिवावर भुजबळ, अजित पवार मोठे झाले त्या शरद पवारांना १० जागा? न समजण्याच्या पलिकडची गोष्ट आहे.
लोकसभेला एक खासदार निवडून आलेल्या अजित पवारांचे ४२ आमदार आले? काय झाले, कसे झाले? हा संशोधनाचा विषय आहे. मी तुम्हाला सांगायला आलो आहे की मतदानावर जाऊ नका. लोकांनी आपल्याला मतदान केले आहे, ते आपल्यापर्यंत आले नाही. लोकांनी मतदान केले, पण ते गायब झाले. अशा प्रकारे निवडणूक लढवायची असेल तर कशाला निवडणूक लढवायची? ही गोष्टही निघून जाईल, कुणीही अमरपट्टा घेऊन जन्माला येत नाही”, असे राज ठाकरे यांनी म्हंटले आहे.
