पुणे : लॉकडाऊनच्या काळात पुण्यातील दुकाने उघडी ठेवण्यासाठी सुरू करण्यात आलेली पी-१, पी-२ ही पध्दत बंद करण्यात आली आहे. त्यामुळे व्यापाऱ्यांना आता आठवड्यातील सर्व दिवस दुकाने सुरू ठेवता येणार आहे.
कोरोना विषाणूचा प्रसार रोखण्यासाठी लागू करण्यात आलेल्या लॉकडाऊनमुळे सुमारे तीन महिने जीवनावश्यक वस्तू वगळता इतर दुकाने बंद होती. त्यानंतर अनलॉक -१ मध्ये दुकाने उघडण्यात आली. मात्र, रस्त्याच्या एका बाजुची दुकाने एका दिवशी आणि दुसऱ्या बाजुची दुसऱ्या अशी सम-विषम (पी-१-पी-२)पध्दत अवलंबण्यात येत होती. त्यामुळे व्यावसायिकांना सर्व दिवस दुकाने उघडी ठेवता येत नव्हती. याबाबत पुणे व्यापारी महासंघातर्फे मुख्यमंत्री उध्दव ठाकरे, राष्ट्रवादी काँग्रेसचे अध्यक्ष शरद पवार, उपमुख्यमंत्री अजित पवार यांच्याकडे मागणी केली होती.
राज्य सरकारचेच आदेश असल्याने पुणे प्रशासन याबाबत निर्णय घेऊ शकत नाही, असे व्यापाऱ्यांना सांगण्यात येत होते. मात्र, सोमवारी मुंबई महापालिकेने पी-१,पी-२ पध्दत रद्द करण्याचा निर्णय घेतला. या पार्श्वभूमीवर पुण्यातही निर्णय घेतला आहे. याबाबतची नियमावली महापालिकेकडून रात्री उशिरापर्यंत जाहीर करण्यात येणार आहे.