पुणे – शहरातील सुमारे आठ हजार अधिकृत व्यावसायिकांचे स्टॉल एकाच आकाराचे म्हणजे पाच फूट बाय तीन फूट करण्याची मोहीम महापालिका प्रशासनाने हाती घेतली आहे. अधिकृत पथारी व्यावसायिकांना प्रमाणपत्रे देण्यासही सुरवात करण्यात आली आहे.
महापालिकेने शहरातील स्टॉल, पथारी व्यावसायिकांचे नुकतेच सर्वेक्षण पूर्ण केले आहे. राष्ट्रीय फेरीवाला धोरणानुसार शहरातील पंधरा रस्त्यांवर त्यांना व्यवसायाच्या जागा निश्चित करून प्रमाणपत्र व ओळखपत्र देण्यात येणार आहे, अशी माहिती महापालिकेच्या अतिक्रमण निर्मूलन विभागाचे प्रभारी प्रमुख माधव जगताप यांनी दिली. ओळखपत्र देतानाच व्यावसायिकांकडून प्रतिज्ञापत्र घेतले जाणार आहे. त्यात स्टॉल असल्यास त्याचा आकार पाच फूट बाय तीन फुटाचा असेल, असे लिहून घेण्यात येणार आहे. यामुळे शहरातील सर्व स्टॉल एकाच आकाराचे होतील, असे जगताप यांनी स्पष्ट केले. तसेच पथारी व्यावसायिकांच्या प्रतिज्ञापत्रात ते दररोज त्यांचा माल व वस्तू घरी घेऊन जातील, सकाळी सात ते ते रात्री आठपर्यंतच त्यांना त्या जागेवर व्यवसाय करता येईल, ती जागा कोणाला भाडेतत्त्वावर देता येणार नाही, विकता येणार नाही, त्या ठिकाणी जागा वाढवून घेता येणार नाही आदी विविध अटींचा समावेश आहे. त्यांचे उल्लंघन झाल्यास त्याबाबत कारवाईस पात्र असेल, असेही त्यात म्हटले आहे.
दरम्यान, अधिकारी पथारी व्यावसायिकांना पथारीच्या जागा निश्चित करताना वाहतुकीला अडथळा येणार नाही, याची काळजी घेण्यात येत आहे. त्यामुळे काही ठिकाणांवरून त्यांना हलविले जाणार आहे. याबाबत शहरातील सध्या 225 ठिकाणांचा आढावा घेतला जात आहे. त्यातील काही ठिकाणी व्यावसायिकांना व्यवसाय करण्यास परवानगी देण्यात येणार आहे, तर काही ठिकाणांवर पूर्वी दिलेली परवानगी रद्द करण्यात येणार आहे. तसेच खाद्यपदार्थ व्यावसायिकांसाठी “फूड प्लाझा‘ उभारण्यात येणार आहे. त्या ठिकाणी त्यांना खाद्यपदार्थ विक्रीस परवानगी दिली जाणार आहे. अन्य ठिकाणी त्यांना परवानगी नसेल, असेही जगताप यांनी नमूद केले.