पुणे-साताऱ्यातील कास पठाराकडे जाणारा रस्ता सोमवारी खचला. त्यामुळे पर्यटकांच्या आकर्षणाचा केंद्रबिंदू असलेल्या पठाराकडे जाण्याचा मार्ग बंद झाला आहे. जागतिक वारसा स्थळ असलेल्या कास पठाराचा पुष्प हंगाम सध्या ऐन बहरात आहे. या काळात कास पठारावर विविध प्रकारची फुले उगवतात. त्यामुळे या काळात मुंबई, पुण्यासह देशभरातून अनेक पर्यटक कास पठारावर येतात. हा हंगाम काही दिवसांपुरताच मर्यादित असल्याने सध्या येथे प्रचंड गर्दीही होताना दिसत आहे. मात्र, आज सकाळी कास पठाराकडे जाणारा यवतेश्वरच्या घाटातील रस्ता अचानकपणे खचला. परिणामी कास पठाराकडे जाण्याचे मार्ग बंद झाले आहेत. यामुळे पर्यटकांच्या आनंदावर विरजण पडले आहे.सार्वजनिक बांधकाम खात्याने या रस्त्याची आवश्यक तेव्हा पाहणी केली काय ? त्याबाबत निगा राखली काय ? या प्रश्नांच्या पार्श्वभूमीवर या घटनेमुळे पीडब्लूडी च्या भोंगळ कारभाराची लक्तरे बाहेर आणणार कोण ?हा सवाल निर्माण झाला आहे .
यवतेश्वर घाटाच्या पायथ्याशी आल्यानंतर पर्यटकांना रस्ता खचल्याचे कळले. येथील रस्त्याचा भाग पूर्णपणे दरीत कोसळला आहे. या दुर्घटनेत कोणतीही जीवितहानी झालेली नाही. परंतु, सुरक्षेचा उपाय म्हणून पोलिसांनी घाटाच्या पायथ्याशीच वाहतूक थांबवली आहे. सध्या सार्वजनिक बांधकाम खात्याकडून युद्धपातळीवर रस्ता दुरुस्तीचे काम सुरू आहे. मात्र, त्यासाठी आणखी बराच वेळ लागण्याची शक्यता आहे.कासचा अधिकृत हंगाम एक सप्टेंबरपासून सुरू झाला आहे. सुरूवातीला सरसकट पर्यटकांना कासवर प्रवेश देण्यात आला. विकेंडला होणारी पर्यटक व गाड्यांची प्रचंड गर्दीने कासवरील नियोजन ढासळू लागले. लगेचच विकेंडला ऑनलाइन बुकिंग करून येणाऱ्या पर्यटकांना प्रवेश हे धोरण राबविण्यास सुरूवात झाली. पहिल्या शनिवारी बोगद्यात वनविभाग व पोलिस कर्मचारी यांनी तिकीट पाहूनच पर्यटकांना कास रस्त्याला सोडले. बुकिंग करून न येणारे तसेच बामणोली व वरती इतर भागात जाण्यारे पर्यटक यांची गैरसोय झाली. त्यातून पर्यटक व व्यवस्थापन यांच्यात वादविवाददेखील झाले होते.आता सारेच बंद झाले आहे .
