पुणे- कोणतीही पूर्व सूचना न देता ,पर्यायी जागा न देता ,पुनर्वसन न करता वाहतूक कोंडीच्या नावाखाली पोलिसांनी जुना बाजार बंद केलेली कृती हि गरिबांच्या पोटावर पाय देणारी असून … आज आम्ही त्यांच्या आदेशाचा सन्मान ठेवून बाजार बंद ठेवला पण रविवारी मात्र आम्ही इथे बाजार भरवणार ,उपजीविकेचा व्यवसाय पुन्हा उभारणार असा इशारा जुन्या बाजारातील विक्रेत्यांच्या संघटनेने दिला आहे . माजी नगरसेवक मुक्तार शेख यांनी या विक्रेत्यांच्या भावना ‘माय मराठी ‘पुढे मांडल्या.
पुण्यातील जुना बाजार हा आठवडे बाजाराच्या धर्तीवर वसलेला पेश्वेकालापासून चालत आलेला बाजार आहे. त्याचे अनेक वेळा स्थलांतर झाले. आणि वाढत्या शहरीकरानामुळे त्यास मान्यता देत विक्रेत्यांनी ते स्वीकारले . पण या पूर्वी कधी कोणाच्या पोटावर पाय देवून हा बाजार बंद कोणी केला नाही . इंग्रजांनी देखील ते केले नाही उलट त्यांनी रविवारी देखील बाजार भरवणे सुरु केले . आता मात्र थेट पोलिसी खाक्या दाखवून हा बाजार कोणतीही पूर्व सूचना न देटा बंद करण्यात आला आहे . या बाजारावर हजार कुटुंबाची उपजीविका चालते . पोलिसांनी अगोदर पर्यायी जागा मिळवून द्यावी नंतर आम्ही तिथे जावू . आज पोलिसी आदेशाचा आम्ही मान ठेवला पण रविवारी मात्र पुन्हा आम्ही इथेच बाजार भरवू असे यावेळी सांगण्यात आले . याबरोबरच या सर्व विक्रेत्यांना नायडू रूग्णालया जवळील जागा द्यावी तेथे पुनर्वसन करावे नंतर पोलिसांनी हा रस्ता वाहतुकीस शंभर टक्के मोकळा करावा अशी भूमिका यावेळी मांडण्यात आली .
या सर्व पार्श्वभूमीवर एकीकडे पोलिसी आदेश दुसरीकडे व्यवसाय बंद झाल्याने हतबल झालेले दुकानदार अशा परिस्थितीत येथे असंतोष निर्माण होतो आहे .
