रशियातील कझानमध्ये झालेल्या इंटरनॅशनल स्किल ऑलिम्पिक्समध्ये पदक मिळवणारी पहिली भारतीय महिला
जगभरातील ६३ देशातील १३५४ स्पर्धकांचा सहभाग; भारतासाठी पदक जिंकल्याचा मनस्वी आनंद : श्वेता
पुणे : रशियाच्या काझानमध्ये नुकत्याच पार पडलेल्या आंतरराष्ट्रीय कौशल्य ऑलिम्पिक अर्थात इंटरनॅशनल स्किल ऑलिम्पिक्स ‘वर्ल्डस्किल्स’ स्पर्धेत ग्राफिक डिझाईन टेक्नॉलॉजी प्रकारात डिझाईन मीडिया अँड एंटरटेनमेंट स्कुलची विद्यार्थिनी श्वेता रतनपुरा हिने कांस्यपदक पटकावले आहे. देशासाठी ग्राफिक डिझाईन टेक्नॉलॉजीच्या प्रकारात कांस्यपदक पटकावणारी श्वेता पहिली भारतीय महिला ठरली आहे. अंतिम ३५ स्पर्धांमधून उल्लेखनीय कामगिरी करीत श्वेताने कांस्यपदकाची कमाई केली. केंद्र सरकारच्या ‘राष्ट्रीय कौशल्य विकास मिशन’अंतर्गत श्वेताने भारताकडून प्रतिनिधित्व केले.
तिच्या या कामगिरीबद्दल पुण्यातील डिझाईन मीडिया आणि एंटरटेनमेंट स्कूलच्या वतीने तिचा सत्कार करण्यात आला. रास्ता पेठेतील शांताई हॉटेलमध्ये झालेल्या या कार्यक्रमाला उद्योजक जयप्रकाश श्रॉफ, डिझाईन मीडियाचे संचालक आणि श्वेताचे मार्गदर्शक सतीश नारायणन, श्रीदेवी सतीश, श्वेताचे वडील विनीतकुमार, आई अमिता यांच्यासह मीडिया डिझाईन अँड एंटरटेनमेंट स्कुलचे मॅनेजर विप्लव पाटीदार आदी उपस्थित होते. यावेळी कझानमध्ये हजारो प्रेक्षकांच्या उपस्थितीत झालेल्या या स्पर्धेची ध्वनीचित्रफीत दाखवण्यात आली.
दर दोन वर्षांनी या स्पर्धेचे आयोजन करण्यात येते. यंदा रशियाच्या कझानमध्ये ही स्पर्धा झाली. जगभरातील ६३ देशांमधील १३५४ स्पर्धकांनी यामध्ये सहभाग घेतला होता. ४४ विविध प्रकारच्या कौशल्यांसह ४८ जणांचा भारतीय संघ या स्पर्धेत उताराला होता. आंतरराष्ट्रीय पातळीवर भारतीय संघाने इतिहास रचत एक सुवर्ण, एक रौप्य, दोन कांस्य आणि १५ जणांनी यशस्वी कामगिरीसाठी ‘मेडल ऑफ एक्सलन्स’ मिळवले आहे.
श्वेता रतनपुरा म्हणाली, “जगभरातील ३५ स्पर्धकांशी माझा सामना होता. ‘वर्ल्डस्किल्स’ स्पर्धेसाठी इंडिया स्किल्सच्या प्रादेशिक स्पर्धेत भाग घेतला, तेव्हापासूनच गेल्या वर्षभरापासूनसराव सुरु होता. स्टेजवरचा प्रवास सोपा नव्हता. बऱ्याचदा नैराश्य, तणाव यायचा. त्यासाठी सतीश नारायणन यांचे मार्गदर्शन, आईवडिलांचा पाठींबा आणि नियमित व्यायाम, योगा, ध्यान उपयुक्त ठरले. शारीरिक आणि मानसिक स्वास्थ्य चांगले ठेवतानाच माझ्यातील नकारात्मक गोष्टी शोधून काढल्या आणि त्यावर काम केले. चार दिवसांच्या या स्पर्धेत विविध गोष्टी सहा तासांमध्ये करायच्या होत्या.
“इंडिया स्किल्स प्रादेशिक स्पर्धेनंतर ग्राफिक डिझाईन टेक्नॉलॉजीच्या ‘वर्ल्ड स्किल्स कझान २०१९’ मध्ये भारताचे प्रतिनिधीत्व करण्यासाठी अनेक फेऱ्यातून श्वेताची निवड करण्यात आली. तिने पुण्यातील डिझाईन मीडिया अँड एंटरटेनमेंट स्कूलमध्ये त्यासाठी प्रशिक्षण घेतले. सतीश नारायणन यांचे मार्गदर्शन व श्वेताची मेहनत यामुळे भारतीयांना अभिमान वाटेल अशी कामगिरी तिने केली आहे,” अशा शब्दात जयप्रकाश श्रॉफ यांनी तिच्या सत्कारावेळी सांगितले.
सतीश नारायणन म्हणाले, “२०१३ मध्ये ‘वर्ल्डस्किल्स’मध्ये भारताचे प्रतिनिधित्व केले होते. पहिल्यांदाच भारताकडून सहभागी झाल्याचा आनंद होता. मात्र, पदक जिंकण्यात मला यश आले नव्हते. पण आज माझ्या मार्गदर्शनाखाली श्वेताने कांस्यपदक जिंकत माझ्यासह भारतीयांना अभिमान वाटेल, अशी कामगिरी केली आहे.”
