पुणे : केंद्रीय मनुष्यबळ विकास मंत्रालय (एमएचआरडी) आणि अखिल भारतीय तंत्रशिक्षण मंडळ (एआयसीटीई) यांच्या सहकार्याने दिघी येथील आर्मी इन्स्टिट्यूट ऑफ टेक्नॉलॉजीमध्ये (एआयटी) नवकल्पनांच्या आढाव्यासाठी (प्रुफ ऑफ कॉन्सेप्ट) ‘एमएचआरडी-एआयसीटीई रिजनल मेन्टॉरिंग’ कार्यक्रमाचे आयोजन केले आहे. ‘इन्स्टिट्यूशन्स इनोव्हेशन कौन्सिल 2.0’ आणि ‘अटल रँकिंग ऑफ इन्स्टिट्यूशन्स ऑन इनोव्हेशन अचिव्हमेंट्स (एआरआयआयए) 2020’ या विषयावर हे मार्गदर्शन सत्र होणार आहे.
येत्या शुक्रवारी (ता. 26) एआयटीच्या कॅम्पसमध्ये होत असलेल्या या एकदिवसीय मार्गदर्शन सत्राचे उद्घाटन सकाळी 9.45 वाजता होणार आहे. या कार्यक्रमासाठी प्रमुख पाहुणे म्हणून मनुष्यबळ विकास मंत्रालयातील मुख्य इनोव्हेशन अधिकारी डॉ. अभय जेरे, ‘एआयसीटीई’ स्टार्टअप कमिटीचे चेअरमन संजय इनामदार प्रमुख पाहुणे म्हणून उपस्थित राहणार आहेत. इनोव्हेशनवरील या मार्गदर्शन सत्रासाठी महाराष्ट्र व गोवा विभागातील 150 हून अधिक विद्यार्थी, तर 100 पेक्षा अधिक शिक्षक सहभागी होणार आहेत.
दिवसभराच्या या सत्रात इन्स्टिट्यूशन्स इनोव्हेशन कौन्सिलचे राष्ट्रीय समन्वयक दिपान साहू, विभागीय समन्वयक पंकज पांडे, मनुष्यबळ विकास मंत्रालयातील इनोव्हेशन अधिकारी सरिम मोईन यांच्यासह एंटरप्रेन्युअरशीप डेव्हलपमेंट इन्स्टिट्यूट ऑफ इंडियाचे डॉ. सत्या रंजन आचार्य मार्गदर्शन करणार आहेत. इनोव्हेशन आणि स्टार्टअप संस्कृतीला चालना देण्यासाठी मनुष्यबळ विकास मंत्रालयाने ‘एआयसीटीई’मध्ये ‘एमएचआरडी इनोव्हेशन सेल’ची स्थापना केलेली आहे. स्मार्ट इंडिया हॅकेथॉन, नॅशनल स्टुडंट पॉलिसी, अटल रँकिंग ऑफ इन्स्टिट्यूशन्स ऑन इनोव्हेशन अचिव्हमेंट्ससह इन्स्टिट्यूशन्स इनोव्हेशन कौन्सिल उभारण्यासाठी पुढाकार घेतला आहे.
