पुणे : फिनोलेक्स उद्योग समूह आणि त्यांचे सीएसआर भागीदार मुकुल माधव फाउंडेशन यांच्या संयुक्त विद्यमाने पालखी सोहळ्यादरम्यान वारकऱ्यांची सेवा करण्यात आली. संत तुकाराम महाराज आणि संत ज्ञानेश्वर महाराज यांच्या पालखी मार्गावर विविध ठिकाणी आरोग्य शिबिरे, फराळ वाटप व पिशव्यांचे वाटप करण्यात आले. यामध्ये दिघी, लोणी, सासवड येथे आरोग्य शिबीर व फराळ-पिशव्यांचे वाटप झाले. दोन्ही संतांच्या पालखी मार्गावर उरुळी कांचन, नीरा, लोणंद, तरडगाव, फलटण, बारामती, इंदापूर, अकलूज, पिराची कुरोली, वाखरी येथे वारकऱ्यांची सेवा झाली. या उपक्रमात निलेश घुले, अविनाश बामणीकर, आशिष कुलकर्णी, कल्याण गोफणे, संतोष शेलार यांनी या उपक्रमाच्या यशस्वितेत मोलाचे योगदान दिले. ससून रुग्णालयाच्या डॉक्टरांनी आरोग्य शिबिरातून वारकऱ्यांची सेवा केली.
——————————
‘अभि चॅरिटेबल’तर्फे मोफत आरोग्य तपासणी
पुणे : अभि चॅरिटेबल फाउंडेशनच्या वतीने वारकऱ्यांसाठी मोफत आरोग्य तपासणी शिबिराचे आयोजन करण्यात आले होते. नारायण पेठ येथे आयोजिलेल्या या शिबिरात वारकऱ्यांची आरोग्य तपासणी केली. यात कान, नाक, डोळे, पाठ, गुडघे अशा अनेक अवयवांची तपासणी करून त्यांना आवश्यक ती औषधे मोफत पुरवण्यात आली. डॉ. ज्योत्स्ना जोशी यांच्या नेतृत्वाखालील डॉक्टरांच्या टीमने वारकऱ्यांना तपासले. वारकऱ्यांची सेवा करण्याची संधी मिळणे हे आमचे भाग्य आहे. अभि चॅरिटेबल फाउंडेशनसोबत गेली ४ वर्षे आम्ही हा उपक्रम राबवत आहोत. यंदा ४०० हुन अधिक वारकऱ्यांनी आरोग्य तपासणी व उपचार घेतले, असे डॉ. जोशी म्हणाल्या. डॉ. सोनाली गिरम, डॉ. शंभवी पाठक यांच्यासह अभि चॅरिटेबल फाउंडेशनच्या सर्व कर्मचाऱ्यांनी मोलाचे योगदान दिले.
——————————
‘आयसीएआय’तर्फे फराळाचे वाटप
पुणे : द इन्स्टिट्यूट ऑफ चार्टर्ड अकाउंटंट्स ऑफ इंडिया (आयसीएआय) पुणे शाखेच्या वतीने संत ज्ञानेश्वर व संत तुकाराम महाराज यांच्या पालखी सोहळ्यातील वारकऱ्यांना फराळाचे वाटप करण्यात आले. साखळीपीर तालीम येथे सकाळी ६ ते ९ या वेळेत सीए, सीए करणारे विद्यार्थी यांच्याकडून चहा-नाश्त्याचे आणि १००० राजगिरा लाडूचे वाटप केले. त्यानंतर परिसरात स्वच्छता अभियान राबविण्यात आले. यावेळी सीए एस. जी. मुंदडा, सीए अभिषेक धामणे, सीए समीर लड्डा यांच्यासह इतर पदाधिकारी आणि सीएचे विद्यार्थी मोठ्या संख्येने उपस्थित होते.
