पुणे : रायसोनी शिक्षण समूहातर्फे औद्योगिक आणि शिक्षण संस्थांमधील (इंडस्ट्री-अॅकॅडमिया) समन्वय वाढविण्याच्या उद्देशाने ‘जीएचआर कनेक्ट’ एक दिवसीय परिषदेचे आयोजन केले आहे. ‘एंगेजिंग विथ मिल्लेन्नियल’ संकल्पनेवर आधारित ही परिषद येत्या शनिवारी (दि. २७ एप्रिल २०१९) पुणे स्टेशनजवळील हॉटेल शेरेटॉन ग्रँड येथे होणार आहे, अशी माहिती रायसोनी शिक्षण संस्थेचे विश्वस्त संचालक अजित टाटिया यांनी पत्रकार परिषदेत दिली. यावेळी रायसोनी शिक्षण संस्थेच्या कॉर्पोरेट रिलेशन्सचे संचालक नागेंद्र सिंग, रायसोनी कॉलेज ऑफ इंजिनीअरिंग अॅन्ड मॅनेजमेंटचे संचालक डॉ. के. के. पालिवाल, रायसोनी इन्स्टिट्यूट ऑफ इंजिनीअरिंग अॅन्ड टेक्नॉलॉजीचे प्राचार्य डॉ. आर. डी खराडकर आदी उपस्थित होते.
अजित टाटिया म्हणाले, “रायसोनी संस्थेकडून पहिल्यांदाच अशा परिषदेचे आयोजन केले आहे. उद्योगांतील प्रमुख पदाधिकारी, लघु व मध्यम उद्योजक आणि शैक्षणिक संस्थांच्या प्रतिनिधींना व्यासपीठ उपलब्ध करुन देण्यासह उद्योग व संबंधितांना केंद्रीय मनुष्यबळ विकास मंत्रालयाचा प्रशिक्षण कार्यक्रम (इंटर्नशीप प्रोग्रॅम) व त्याच्या अंमलबजावणीतील आव्हानांविषयी जागृत करण्याच्या उद्देशाने ही परिषद आयोजिली आहे. कुशल मनुष्यबळाचा अभाव ही आज भारतीय उद्योगांसमोरील समस्या आहे. त्यावर मात करण्यासाठी विद्यार्थ्यांना सहा आठवड्यांच्या आणि सहा महिन्यांच्या प्रशिक्षणाची, प्रात्यक्षिकांची संधी मिळावी. मनुष्यबळ विकास मंत्रालय आणि अखिल भारतीय तंत्रशिक्षण परिषद (एआयसीटीई) यांनीही प्रशिक्षण कार्यक्रमाचे धोरण आखण्याच्या सूचना केल्या आहेत.”
डॉ. आर. डी. खराडकर म्हणाले, “ परिषदेचे उद्घाटन सावित्रीबाई फुले पुणे विद्यापीठाचे माजी कुलगुरु डॉ. रघुनाथ शेवगावकर यांच्या हस्ते होणार आहे. यावेळी टाटा कन्सल्टन्सी सर्व्हिसेसचे (टीसीएस) उपाध्यक्ष दीनानाथ खोळकर, एल अँड टीचे श्री. हरी यांचे बीजभाषण होईल. रायसोनी शिक्षण संस्थेचे कार्यकारी संचालक श्रेयस रायसोनी यांची विशेष उपस्थिती असणार आहे. या परिषदेत सरव्यवस्थापक व त्यावरील ५० हुन औद्योगिक पदाधिकारी, तर आयटी, उत्पादन, अॅटोमोबाईल, पायाभूत सुविधा क्षेत्रातील १५० पेक्षा अधिक उद्योगांचे प्रतिनिधी उपस्थित राहणार आहेत.”
“परिषदेत आयोजित तीन चर्चासत्रांमध्ये रामेलेक्स इंडस्ट्रीजचे अध्यक्ष राम जोगदंड, आयनॉटिक्सचे उपाध्यक्ष बळीराम मुटगेकर, टाटा टेक्नॉलॉजीचे उपाध्यक्ष डॉ एम. मनी, एम्फासिसचे वरिष्ठ व्यवस्थापक माजीद खान, बजाज ऑटोचे सहाय्यक सरव्यवस्थापक श्री. ठक्कर, थरमक्सचे प्रशांत कुलकर्णी, किर्लोस्कर ऑईल इंजिन्सचे सरव्यवस्थापक डॉ. आर. आशेदार, भारत इलेक्ट्रॉनिक्सचे अतिरिक्त सरव्यवस्थापक धनराज कोल्हे, बीओ पीईईचे सल्लागार विकास राबले, भारत फोर्जच्या वरिष्ठ व्यवस्थापक लीना देशपांडे, एस्सार स्टीलचे सहायक सरव्यवस्थापक ऑलविन डीसूझा सहभागी होणार आहेत. अभियांत्रिकीच्या विद्यार्थ्यांना उद्योगांत इंटर्नशीपसाठी आवश्यक कौशल्यांची माहितीही हे तज्ज्ञ देणार आहेत. यावेळी विविध पुरस्कारांचे वितरणही करण्यात येणार आहे.”
उद्योगातील प्रमुख, पदाधिकारी, महाविद्यालयांचे प्राचार्य, संचालक, अधिष्ठाता आदींनी या परिषदेत सहभागी व्हावे. ही परिषद सर्वांसाठी विनामूल्य आहे, परंतु, मर्यादित आसन क्षमतेमुळे नोंदणी आवश्यक आहे.
