पुणे : सिंधी नववर्ष आणि भगवान साई झुलेलाल यांच्या १०६९ व्या जयंतीनिमित्त आयोजित चेटीचंड महोत्सवाची सुरुवात रथयात्रेने झाली. भगवान झुलेलाल यांचा जन्मोत्सव चेटीचंड महोत्सव म्हणून साजरा केला जातो. पुण्यातील सिंधू सेवा दलाच्या वतीने शनिवारी सायंकाळी ६.०० वाजता भगवान झुलेलाल यांची आरती करून ही रथयात्रा काढण्यात आली. यात्रेमध्ये सर्वात पुढे भगवान झुलेलाल यांच्या वेशभूषेतील झुलेलाल, त्यामागे त्यांची मूर्ती, सिंधी भजनसंगीत म्हणणाऱ्या महिला आणि प्रसाद असे या रथयात्रेच्या स्वरूप होते. साधारणपणे २५०-३०० नागरिक यामध्ये सहभागी झाले होते.
भवानी पेठेतल्या पदमजी कंपाउंड येथून या रथयात्रेला सुरुवात झाली. बाबाजान चौक, एमजी रस्ता, अरोरा टॉवर्स, लाल देऊळ, मित्तलकोर्ट, क्वार्टर गेट, पदमजी पार्क, पदमजी कंम्पाउंड अशी ही रथयात्रा मार्गस्थ झाली. सर्वात पुढे वेल्हे तालुक्यातील कोंडगाव येथील श्री शिवाजी मित्र मंडळाचे लेझीम व झांजपथक, तर मुंबईतील महेश ग्रुपचे ढोलपथक सहभागी झाले होते. त्यांचे वादन आणि विविध खेळ यामुळे रस्ता दुमदुमून गेला. वाटेत अनेक ठिकाणी पाणी, नाश्ता व इतर सेवा पुरविण्यात आली. सिंधू सेवा दलाचे अध्यक्ष दीपक वाधवानी, उपाध्यक्ष अशोक वासवानी, सचिव सचिन तलरेजा, खजिनदार पिशू पर्यानी, सहसचिव परमानंद भटिजा, माजी अध्यक्ष सुरेश जेठवानी, विजय दासवानी, सिमरन जेठवानी, डिंपल वासवानी, विनोद रोहानी यांच्यासह इतर अनेक मान्यवर सहभागी झाले. शालेय विद्यार्थी आणि महिला वर्गाने मोठ्या उत्साहाने यात सहभाग घेतल्याचे दीपक वाधवानी म्हणाले.
