पुणे, दि. ०८ मे २०२५: येत्या काही दिवसांमध्ये मान्सूनचे आगमन होत आहे. पावसाळी परिस्थितीत वीजपुरवठा सुरळीत ठेवण्यासाठी महावितरण व महापारेषणच्या पुणे परिमंडलामधील वीज उपकेंद्रांतील व वीजवाहिन्यांवरील यंत्रणेच्या मान्सूनपूर्व देखभाल व दुरूस्तीचे पूर्वनियोजित कामे वेगाने सुरू आहेत. मे महिन्याच्या अखेरीस सर्व कामे पूर्ण करण्यात येणार आहेत.

       पावसाळ्यात वीजयंत्रणा सज्ज ठेवण्यासाठी तसेच वीजपुरवठा खंडित होण्याचे व वीजसुरक्षेचे धोके टाळण्यासाठी ग्राहकांना पूर्वसूचना देऊन देखभाल व दुरुस्तीचे कामे प्रामुख्याने दर गुरूवारी करण्यात येत आहेत. महापारेषण व महावितरणच्या समन्वयातून ही कामे सुरु आहेत. महावितरणकडे ग्राहक क्रमांकासोबत नोंदणी केलेल्या मोबाईल क्रमांकावर ‘एसएमएस’द्वारे संबंधित वीजग्राहकांना पूर्वनियोजित वीज बंदाबाबत कळविण्यात येत आहे. तसेच वृत्तपत्रांमध्ये वीज बंदचे जाहिरात निवेदन प्रसिद्ध करण्यात येत आहे. सोबतच बाधित होणाऱ्या क्षेत्रात पर्यायी अन्य वीजयंत्रणेतून वीजपुरवठा उपलब्ध करून देण्यास सर्वाधिक प्राधान्य देण्यात येत आहे.

पूर्वनियोजित देखभाल व दुरुस्तीच्या कामांमध्ये प्रामुख्याने वीजवाहिन्यांना स्पर्श करणाऱ्या झाडांच्या छोट्या फांद्या तोडणे, तूटलेले पीन व डिस्क इन्सूलेटर्स बदलणे, वितरण रोहित्रे, फिडर पिलर, रिंगमेन युनिटचे अर्थिंग तपासणे, ऑइल फिल्टरेशन व ऑइल टॉपिंग अप, रोहित्राच्या वितरण पेटीची दुरुस्ती, नादुरुस्त लाईटनिंग अरेस्टर बदलणे, वीजखांब व तारांचे मजबुतीकरण, तारांमधील झोल काढणे, गंजलेले किंवा खराब झालेले वीजखांब बदलणे, जुन्या वीजतारा बदलणे, फिडर पिलरची साफसफाई व आवश्यकतेनुसार इन्सूलेशन स्प्रे मारणे, उच्च व लघुदाब वीजतारांना गार्डिंग करणे यासह उपकेंद्रातील ब्रेकर्सची दुरुस्ती, बॅटरी चार्जिंग, पॉवर ट्रान्सफॉर्मरची देखभाल व ऑइल टॉपिंग अप अशा व इतर विविध दुरुस्ती कामांसह वीजपुरवठ्याच्या पर्यायी यंत्रणा सज्ज करणे आदी कामे करण्यात येत आहेत.

महापारेषण व महावितरणकडून गुरुवारी (दि. ८) नांदेड सिटी, धायरी गाव, नऱ्हे गाव, रायकर मळा, नांदेड गाव, वडगाव, देशपांडे गार्डन सोसायटी, बाजीराव रस्ता, शुक्रवार पेठ, फडतरे चौक, पेशवे पार्कचा काही भाग, कर्वेनगर, थोरात कॉलनी, आनंद निकेतन, मधुबंध कॉलनी, नवसह्याद्री सोसायटी, वसंतनगर, इंदिरा पार्क, आनंदनगर, गुजरात कॉलनी, एमआयटी कॉलेज रस्ता, रहाटणीसह खराडी व वडगाव शेरीचा काही भाग तसेच भोसरी, पिंपरी चिंचवड व तळवडे एमआयडीसी, भोसरी, देहू, मोशी, चिखलीचा काही परिसर या भागात पूर्वमाहिती देऊन वीजयंत्रणेचे पूर्वनियोजित देखभाल व दुरुस्तीचे कामे करण्यात आली.

खाजगी किंवा विविध संस्था मालकीच्या जागेतील झाडांच्या मोठ्या फांद्या वादळ व मुसळधार पावसामुळे कुंपणाबाहेरील उपरी वीजवाहिन्यांवर कोसळण्याची शक्यता असते. त्याचा अंदाज घेऊन वीजवाहिन्यांना संभाव्य धोका असणाऱ्या झाडांच्या मोठ्या फाद्यांची संबंधितांनी महानगरपालिकेची पूर्वपरवानगी घेऊन किंवा त्यांच्या सहाय्याने छटाई करावी. यासाठी आवश्यकतेनुसार सहकार्य करण्यात येईल असे आवाहन महावितरणकडून करण्यात आले आहे.

डेला रिसॉर्ट्स अँड ऍडव्हेंचर आणि हिरानंदानी कम्युनिटीज अँड क्रिसला डेव्हलपर्स ची भागीदारी

मुंबई, ८ मे २०२५: डेला रिसॉर्ट्स अँड ऍडव्हेंचरने हिरानंदानी कम्युनिटीज अँड क्रिसला डेव्हलपर्ससोबत
प्रोप्रायटरी सीडीडीएमओ TM मॉडेलसाठी हातमिळवणी केली आहे. तब्बल ११०० कोटी रुपये उत्पन्न मिळवून
देण्याची क्षमता असलेली रेसकोर्स थीम्ड मेगा टाऊनशिप उभारण्यासाठी ही भागीदारी करण्यात आली आहे.
महत्त्वाचे म्हणजे भारतीय स्थावर मालमत्ता उद्योगक्षेत्रात हे पाऊल पहिल्यांदाच उचलले गेले आहे. विशिष्ट
संकल्पनेवर आधारित, हॉस्पिटॅलिटी-चलित मॉडेलने स्थावर मालमत्ता क्षेत्रात एक नवीन गुंतवणूक वर्ग खुला
आहे, ज्यामध्ये गुंतवणुकीवर ९% पर्यंत परतावा देण्याची क्षमता आहे. या मॉडेलमुळे हा मूल्य प्रस्ताव स्थावर
मालमत्तेच्या पलीकडे जाऊन, एक खास निवडण्यात आलेली लाईफस्टाईल इकोसिस्टिम निर्माण करतो,
ज्यामध्ये अतुलनीय लक्झरी, कम्युनिटी आणि अनुभवात्मक हॉस्पिटॅलिटी यांचा मिलाप आहे.
पुण्यातील वेगाने विकसित होत असलेल्या उत्तर हिंजवडीमध्ये तब्बल ४० एकरांहून मोठ्या परिसरात
वसवण्यात येणार असलेल्या या टाऊनशिपमध्ये ८ एकरांचे रेसकोर्स आणि इंटरनॅशनल पोलो क्लब, १२८
खाजगी व्हिला प्लॉट्स, ११२ रिसॉर्ट खाजगी निवास, ३०० खोल्यांचे पंचतारांकित लक्झरी रिसॉर्ट, ९ वेडिंग
डेस्टिनेशन व्हेन्यू, १२ कॉर्पोरेट आणि माईस व्हेन्यू, एक्स्ट्रीम ऍडव्हेंचर पार्क, डेला रेन्ज गोल्फ, वेलनेस सुविधा
आणि डेलाची खासियत म्हणून ओळखल्या जाणाऱ्या डिझाईन संवेदनांनी सजलेल्या एक्स्पेरिएन्शियल जागा
यांचा समावेश असेल. या टाऊनशिपची आधुनिक ऑरगॅनिक आणि ब्रिटिश कलोनियल आर्किटेक्चरल आणि
डिझाईन शैली अनुभवात्मक जगणे, स्थिर परतावा आणि दीर्घकालीन संपत्ती वृद्धी यांना महत्त्व देणाऱ्या
घरमालकांच्या व गुंतवणूकदारांच्या नवीन पिढीच्या सौंदर्याशी संबंधित आवडीनिवडींना पुरेपूर अनुरूप आहे.
डेला रिसॉर्ट्स अँड ऍडव्हेंचरचे संस्थापक आणि अध्यक्ष तसेच या महत्त्वपूर्ण विकासामागे ज्यांची दूरदृष्टी आहे
असे श्री जिमी मिस्त्री यांनी सांगितले, “ही केवळ एक टाऊनशिप नाही तर भारतामध्ये आजवर कधीही पहिले न
गेलेल्या स्थावर मालमत्ता मॉडेलचा हा उदय आहे. सीडीडीएमओ दृष्टिकोनासह आम्ही स्थावर मालमत्तेला
केवळ उत्पादन नव्हे तर अनुभव म्हणून निर्माण करू इच्छितो. आमची इच्छा आहे की, स्थावर मालमत्ता ही
केवळ एक स्थिर संपत्ती बनून राहू नये तर, गतिशील, परतावा मिळवून देणारी गुंतवणूक बनावी. पहिल्यांदाच
निवासी स्थावर मालमत्तेमध्ये उद्योगक्षेत्रातील आजवरच्यापेक्षा म्हणजे ३% पेक्षा जास्त परतावा मिळत आहे,
स्थावर मालमत्ता गुंतवणुकीवर पारंपरिक अपेक्षांपेक्षा जास्त ९% पर्यंत खात्रीशीर परतावा दिला जात आहे. हे
लक्झरी फ्यूचर फिट लिव्हिंग आहे, अचूकपणे डिझाईन करण्यात आले आहे आणि डिझाईन, नावीन्य व
संचालनातील उत्कृष्टता याचा आधार आहे.”उद्योगक्षेत्रातील दिग्गज, हिरानंदानी कम्युनिटीजचे अध्यक्ष डॉ निरंजन

हिरानंदानी यांनी या भागीदारीविषयीसांगितले, “भारतीय स्थावर मालमत्ता उद्योगामध्ये आमूलाग्र परिवर्तन घडून येत

आहे, एकात्मिक, वन-स्टॉप डेस्टिनेशन्समध्ये जीवनशैलीवर भर देणाऱ्या जगण्याबाबत घरखरेदीदारांच्या वाढत्या महत्त्वाकांक्षा या
परिवर्तनाला दिशा आणि चालना देत आहेत. ग्राहककेंद्रितता वाढवण्यासाठी जागा आणि सेवा यांचे एकीकरण
करणारे ट्रेंड्स उद्योगक्षेत्राने स्वीकारले पाहिजेत. आधुनिक घरखरेदीदारांच्या आवडीनिवडी बदलत आहेत,
त्यालाच अनुसरून स्थावर मालमत्ता विकासक महत्त्वाकांक्षी भारतीय घरमालकाच्या गरजा पूर्ण करण्यासाठी
तयार करण्यात आलेल्या अभिनव इकोसिस्टिम तयार करण्यासाठी पूरक उद्योगांसोबत हातमिळवणी करत
आहेत.
नावीन्य आणि ट्रेंड्स निर्माण करणे हे नेहमीच हिरानंदानीचे हॉलमार्क्स म्हणून ओळखले जातात. उत्तर
हिंजवडी, पुण्यामध्ये १०५ एकरांच्या टाऊनशिपसाठी क्रिसला डेव्हलपर्ससोबत आमची धोरणात्मक भागीदारी
म्हणजे हिरानंदानी ग्रुपने पुण्यातील वेगाने वाढत असलेल्या स्थावर मालमत्ता बाजारपेठेत केलेले पदार्पण आहे.
शिवाय डेला ग्रुपसोबत केलेला विकास व्यवस्थापन करार विशेष निवडण्यात आलेल्या, खास अनुभव देणाऱ्या,
राहण्याच्या जागा पुरवण्याची आम्ही कटिबद्धता मजबूत करतो. जीवनशैलीची नवी व्याख्या रचणे, प्रत्यक्ष
वापर करणारे आणि गुंतवणूकदार या दोघांसाठी देखील मूल्य प्रस्ताव वाढवणे आणि भारतीय स्थावर मालमत्ता
क्षेत्रात नवीन मानके स्थापन करणे हा या भागीदारीचा उद्देश आहे.”
क्रिसला डेव्हलपर्सचे सीएमडी श्री सागर अगरवाल म्हणाले, “हिरानंदानी कम्युनिटीजसोबत आम्ही ज्या १०५
एकरांच्या एकीकृत टाऊनशिपची संकल्पना करत आहोत, ती स्केल, सस्टेनेबिलिटी आणि स्मार्ट शहरवादावर
आधारित आहे. डेला टाऊनशिप्ससोबत ४० एकर परिसरासाठी आम्ही भागीदारी ही धोरणात्मक भागीदारी
करण्याच्या क्रिसला डेव्हलपर्सच्या मूलभूत शक्तीमुळे शक्य झाले आहे ज्यामुळे व्हिजन आणि मूल्य या
दोन्हींमध्ये वाढ झाली आहे. या सेगमेंटमुळे निवासी स्थावर मालमत्तेमध्ये अनेक गोष्टी या उद्योगक्षेत्रात
पहिल्यांदाच आणल्या जातील, प्रीमियम खाजगी व्हिला प्लॉट्स, सिग्नेचर निवास, रेसकोर्स, रिसॉर्ट, ऍडव्हेंचर
पार्क यांचा यामध्ये समावेश आहे, ज्यामुळे शहरी जीवनाच्या मध्यभागी हॉस्पिटॅलिटी प्रस्तुत केली जाईल.
उत्तर हिंजवडीमध्ये असल्याने मुंबई-बंगलोर राष्ट्रीय महामार्गापासून अगदी जवळ आहे, ही टाऊनशिप घर
खरेदीदार आणि गुंतवणूकदार दोघांसाठी देखील आकर्षक ठरेल. डेलासोबत आम्ही एक असे डेस्टिनेशन तयार
करत आहोत ज्यामध्ये उत्तम राहण्याच्या जागा, महत्त्वाकांक्षा आणि उच्च मूल्य गुंतवणूक यांचा मिलाप
असेल, निवासी स्थावर मालमत्तेची नवीन राष्ट्रीय मापदंड निर्माण केले जातील.”
सध्या हा प्रकल्प नियोजनाच्या खूप वरच्या टप्प्यांवर आहे, जमीन अधिग्रहण पूर्ण झालेले आहे आणि
डिझाईनला अंतिम मंजुरी देण्याचे काम सुरु आहे. टाऊनशिपचा पहिला फेज तीन महिन्यांमध्ये लॉन्च होईल
आणि रिसॉर्ट व व्हिला प्लॉट्ससाठी पुढील वर्षीच्या सुरुवातीला ताबा दिला जाण्याची शक्यता आहे. २०२६
वर्षाच्या अखेरीस खाजगी निवासांचा ताबा दिला जाईल अशी अपेक्षा आहे. शहरी जगण्याची नवी व्याख्या तयार
केली जावी आणि ही टाऊनशिप म्हणजे पुण्यातील एक सांस्कृतिक हॉटस्पॉट बनावा तसेच इतर उदयास येत
असलेल्या भारतीय महानगरांसाठी एक अनुकरणीय मॉडेल तयार केले जाते हा या हॉस्पिटॅलिटीवर आधारित
थीम्ड टाऊनशिपचा उद्देश आहे.

थॅलेस्मियाग्रस्त मुलांसाठी कार्यकर्त्यांचे रक्तदान
जागतिक थॅलेस्मिया दिनानिमित्त उपक्रमाचा शुभारंभ
जय गणेश व्यासपीठाचा विधायक उपक्रम
पुणे : जय गणेश व्यासपीठाच्या माध्यमातून गणेश मंडळाच्या कार्यकर्त्यांनी ‘बाप्पाचा कार्यकर्ता.. रक्तदाता उपक्रम’ हे आणखी एक विधायक कार्य हाती घेतले आहे. पुण्यातील एकवीस गणपती मंडळांचे कार्यकर्ते थॅलेस्मियाने ग्रस्त मुलांसाठी दर महिन्याला रक्तदान करणार आहेत.
जागतिक थॅलेस्मिया दिनाचे औचित्य साधून या उपक्रमाचा शुभारंभ आज (दि. ८) ससून रुग्णालयात करण्यात आला.
या उपक्रमात साईनाथ मंडळ ट्रस्ट, बुधवार पेठ, सेवा मित्र मंडळ, शुक्रवार पेठ, अष्टविनायक मित्र मंडळ, नवी पेठ, श्री शनि मारुती बाल गणेश मंडळ, एरंडवणे, नवज्योत मित्र मंडळ ट्रस्ट, येरवडा, श्री पोटसुळ्या मारुती मंडळ, गणेश पेठ, एकता मित्र मंडळ, अरण्येश्वर, नवजवान मित्र मंडळ, गणेश पेठ, व्यवहार आळी चौक मित्र मंडळ, कसबा पेठ, वीर शिवराज मंडळ गुरुवार पेठ, संयुक्त मित्र मंडळ, सदाशिव पेठ नागनाथ पार चौक, नवग्रह मित्र मंडळ, कसबा पेठ, वीर हनुमान मित्र मंडळ, क्रांती चौक, बुधवार पेठ, सत्यवीर मित्र मंडळ, शिवदर्शन, श्री अष्टविनायक मित्र मंडळ, येरवडा, त्रिशुंड मयुरेश्वर विजय मंडळ ट्रस्ट, सोमवार पेठ, राष्ट्रीय साततोटी हौद मंडळ ट्रस्ट, कसबा पेठ, युवा वाद्य ढोल पथक, जनार्दन पवळे संघ, अखिल मोहन नगर मंडळ आणि विधायक मित्र मंडळे सहभागी झाली आहेत.
या मंडळांचे कार्यकर्ते दर महिन्याला ससून रुग्णालयात थॅलेस्मियाने ग्रस्त मुलांसाठी रक्तदान करणार आहेत. वर्षभरात साधारण 250 पेक्षा अधिक कार्यकर्ते रक्तदाते होणार आहेत. गणेश मंडळांच्या वतीने रक्तादन शिबिर आयोजित करण्यात येते त्यास ससून रुग्णालयातील रक्तपेढीला प्राधान्य देणार आहेत.
या कार्यक्रमाचे आयोजन पियूष शाह, शिरीष मोहिते, स्वप्नील दळवी, सुधीर ढमाले,राहुल जाधव, अमित जाधव, कुणाल पवार, राकेश दाखवे, शंतनू पाटसकर, किरण सोनीवाल, आदित्य मारणे, हर्षद नवले, सचिन पवार, अभिषेक मारणे यांनी केले.
उपक्रमास ससून हॉस्पिटलचे डीन डॉ. एकनाथ पवार, अधीक्षक यल्लाप्पा जाधव, थॅलेस्मिया वॉर्डच्या डॉ. आरती किणीकर, स्टाफ विद्या सुपेकर यांचे सहकार्य लाभले.

पुणे : मराठी भाषेला अभिजात भाषेचा दर्जा मिळाल्याचे निमित्त साधून शरद क्रीडा व सांस्कृतिक प्रतिष्ठानतर्फे घेण्यात आलेल्या राष्ट्रीय स्तरावरील मराठी काव्य स्पर्धेचा निकाल जाहीर करण्यात आला आहे. प्रसिद्ध अभिनेते प्रवीण तरडे यांनी निकालाची घोषणा केली.
मराठी भाषेला अभिजात भाषेचा दर्जा मिळाल्यानिमित्त केंद्र सरकार, राज्य सरकार व अभिजात भाषेसंदर्भात काम करणाऱ्या समितीचे आपल्या काव्यातून आभार या विषयावर राष्ट्रीय स्तरावर काव्य स्पर्धेचे आयोजन करण्यात आले होते. स्पर्धेत सहाशेपेक्षा जास्त कवींनी भाग घेतला होता, अशी माहिती शरद क्रीडा व सांस्कृतिक प्रतिष्ठानचे संस्थापक अध्यक्ष लक्ष्मीकांत खाबिया यांनी दिली.
प्रथम क्रमांक मिळालेले स्पर्धक : प्रतिभा विभूते, पुणे; राजेंद्र उगले, नाशिक; संगीता भालेराव, दौंड; डॉ. प्रविण किलनाके, सुवर्णा पवार, कोल्हापूर; बी. डी. घरत, रायगड; शैलजा जाधव, चांदवड.
द्वितीय क्रमांक मिळालेले स्पर्धक : संजय कावरे, अकोला; सोनाली कांबळे, धाराशिव; श्रद्धा काळे, ठाणे; संध्या केळकर, मुंबई; स्मिता जैन, पुणे; स्नेहल येवला, ठाणे.
तृतीय क्रमांक मिळालेले स्पर्धक : शिल्पा वाघमारे, अकोला; माधुरी मंगरुळकर, पुणे; वर्षा आपटे, सांगली; दिगंबर ढोकळे, भोसरेी; रामकृष्ण महाराज पाटील, रावेत; प्रतिभा खैरनार, नांदगाव.
उत्तेजनार्थ पारितोषिक मिळालेले स्पर्धेक : दिपा वणकुद्रे, मुबंई; सीताराम करकरे, निगडी; मंगला भोयर, यवतमाळ; स्मिता पेशवे, उस्मानाबाद; रेखा मालपुरे, कल्याण; निमिला फाटक, निगडी.

शरद क्रीडा व सांस्कृतिक प्रतिष्ठानचा उपक्रम अभिमानास्पद : प्रवीण तरडे

मराठी भाषेला अभिजात भाषेचा दर्जा मिळाला याचा आनंद आहे. याचे निमित्त साधून शरद क्रीडा व सांस्कृतिक प्रतिष्ठानने राष्ट्रीय पातळीवर मराठी भाषेत काव्य स्पर्धा आयोजित करून प्रतिभावान कवींना व्यासपीठ मिळवून देण्याबरोबरच मराठी भाषेविषयी जनजागृती करण्याचे काम केले आहे. प्रतिष्ठानची ही अभिमानास्पद कामगिरी आहे, असे प्रवीण तरडे यांनी म्हणाले.

पुणे : पुण्यातील हौशी, प्रतिभावान छायाचित्रकारांनी काढलेल्या वैविध्यपूर्ण छायाचित्रांमधून ग्रामीण जनजीवन आणि निसर्गाचा विलोभनीय आविष्कार पुणेकरांसमोर आज आला.
पुणे कॉटन कंपनी, देहम्‌‍ नेचर क्युअर आणि कृतार्थ यांच्या संयुक्त विद्यमाने हौशी छायाचित्रकारांच्या ‌‘प्रतिबिंब‌’ या छायाचित्रांचे प्रदर्शन बालगंधर्व कला दालनात भरविण्यात आले असून प्रदर्शनाचे उद्घाटन आज (दि. 8) सुप्रसिद्ध पक्षी छायाचित्रकार डॉ. सुधीर हसमनीस आणि क्रिकेट विश्लेषक-समालोचक सुनंदन लेले यांच्या हस्ते झाले. देहम्‌‍ नेचर क्युअरचे संचालक डॉ. सुजय लोढा, डॉ. कोमल लोढा, कृतार्थचे संचालक निलेश शुक्ला, दिपाली शुक्ला, उद्योजक निरंजन देशपांडे यांची प्रमुख उपस्थिती होती.
अमर अतितकर, अमेय वाळवेकर, ओंकार मुळगुंद, केदार दंडगे, विलास तोळसंकर, समीर अय्यर, विश्वेश बेहरे, अनंतप्रसाद देशपांडे, अमोद फडके आणि सागर मुथा यांची व्यन्यजीव, पक्षी, निसर्ग आणि ग्रामीण जनजीवन या विषयांवरील अनोखी छायाचित्रे प्रदर्शनात आहेत. प्रदर्शन दि. 10 मे पर्यंत सकाळी 10 ते रात्री 8 या वेळात सर्वांसाठी खुले आहे.
छायाचित्रणाची आवड कशी जोपासली याविषयी कथा विशद करून मनोगत व्यक्त करताना डॉ. सुधीर हसमनीस म्हणाले, छायाचित्रणामुळे निसर्गाच्या सान्निध्यात वारंवार गेलो. निसर्गाशी जवळीक साधल्यामुळे आयुष्यातील ताण-तणाव तर दूर झालेच पण प्रकृतीही ठणठणीत ठेवण्यात बळ मिळाले.
सुनंदन लेले म्हणाले, छायाचित्रण ही कला आहे. ती जोपासण्यासाठी संयमाची फार गरज असते. निसर्ग, निसर्गातील प्राणी-पक्ष्यांच्या हालचाली टिपताना हा संयमच उपयोगी पडतो. कॅमेऱ्याला भावना नसतात पण छायाचित्रकाराला असतात; त्यामुळेच छायाचित्रकाराच्या नजरेतून टिपलेला क्षण बरेच काही सांगून जातो.
डॉ. कोमल लोढा, निलेश शुक्ला, दिपाली शुक्ला यांनी मनोगत व्यक्त केले. मान्यवरांचे स्वागत केदार दंडगे, संदीप वाळवेकर, प्रसाद न्यायाधीश, ओंकार मुळुगंद यांनी केले. तर छायाचित्रकारांचा सत्कार उपस्थित मान्यवरांच्या हस्ते करण्यात आला. कार्यक्रमाचे सूत्रसंचालन प्रिया मुळगुंद यांनी केले.

पुणे :नृत्यगुरु पं.मनीषा साठे यांच्या ‘मनीषा नृत्यालय’च्या सुवर्ण महोत्सवानिमित्त ‘शांभवीज् इंटरनॅशनल स्कुल ऑफ कथक’  तर्फे  न्यूझीलंडमध्ये   ‘नृत्य संवाद’ हा कार्यक्रम आयोजित करण्यात आला आहे ! पं.मनीषा साठे आणि त्यांची  कन्या शांभवी दांडेकर या दोघींच्या कथक नृत्याचे सादरीकरण या कार्यक्रमात होणार आहे.दि.१६ मे २०२५  रोजी ऑकलंड परफॉरमिंग  आर्ट सेंटर(ऑकलंड) ,दि.२४ मे रोजी  वेलिंग्टन,दि.२५ मे रोजी ख्राईस्टचर्च येथे हे कार्यक्रम होणार आहेत.कथक नृत्य क्षेत्रातील योगदानाबद्दल पं.मनीषा साठे यांचा सत्कारही न्यूझीलंडस्थित भारतीयांच्या वतीने करण्यात येणार आहे. ‘मनीषा नृत्यालय’च्या सुवर्ण महोत्सवानिमित्त भारतात आणि परदेशात अनेक कार्यक्रम आयोजित करण्यात आले असून न्यूझीलंड दौरा हा त्यापैकी एक आहे. 

  पं.मनीषा साठे…’नृत्यार्पित जीवन  प्रवास
मनीषा साठे यांनी कथक नृत्याचे शिक्षण लहान वयात पुण्यात पं. बाळासाहेब गोखले यांच्याकडे घेतले. पुढे त्यांनी पं. गोपीकृष्ण यांच्याकडे मुंबई येथे शिक्षण सुरू ठेवले. प्रदीर्घ कारकिर्दीत त्यांनी सवाई गंधर्व भीमसेन संगीत महोत्सव, खजुराहो नृत्य महोत्सव, शनिवारवाडा नृत्य महोत्सव, लखनौ नृत्य महोत्सव, गोहत्ती येथील कामाख्या महोत्सव, मुंबईमधील नेहरू सेंटर आणि टाटा थिएटर अशा भारताच्या विविध ठिकाणी कथक नृत्य सादर केले आहे. तसेच भारताबाहेर अमेरिका, चीन, बहरैन, स्वित्झर्लंड, स्वीडन, जपान इ. देशांत त्यांनी कार्यक्रम केले आहेत.

कथक नृत्यात आधुनिक संगीत आणि विश्व संगीताचा वापर हे त्यांचे वैशिष्ट्य आहे. त्यांनी जपानी संगीताबरोबरही कथक सादर केले आहे. जपानी संगीतकार आणि ताईको वादक यासुहितो ताकीमोतो यांच्याबरोबर त्यांनी गेल्या १५ वर्षांत अनेक फ्युजन मैफली सादर केल्या आहेत.मनीषा साठे यांनी ‘सरकारनामा’ आणि ‘वारसा लक्ष्मीचा’ यांसह अनेक चित्रपटांसाठी नृत्य दिग्दर्शन केले आहे. महाराष्ट्र राज्य पुरस्कार आणि अल्फा टी.व्ही. पुरस्कार सोहोळ्यात त्यांना सर्वोत्तम नृत्य दिग्दर्शकाचा पुरस्कार मिळाला आहे.साठे या ‘मनीषा नृत्यालय ट्रस्ट’ या नावाची कथक नृत्याचे शिक्षण देणारी संस्था चालवतात. त्यांच्या अनेक विद्यार्थिनींना भारत सरकारच्या सांस्कृतिक खात्याची शिष्यवृत्ती मिळाली आहे.